На бягучы і капітальны рамонты аб'ектаў у бюджэце вобласці прадугледжана 20,1 млн. рублёў, і яшчэ 7,9 - на набыццё абсталявання.
Як паведаміла начальнік упраўлення па адукацыі Мінаблвыканкама Таццяна Апраніч, да новага навучальнага года зробяць рамонт дахаў у дзясятках устаноў, абновяць амаль сотню харчаблокаў, сем дзясяткаў спартыўных залаў, амаль 200 санвузлоў, стадыёны, добраўпарадкуюць тэрыторыі, выканаюць і іншыя работы, каб дзіцячыя сады, школы, гімназіі і каледжы сустрэлі сваіх навучэнцаў у поўнай гатоўнасці.
У бягучым годзе плануецца завяршыць рамонт 4 устаноў адукацыі ў Вілейскім, Валожынскім, Клецкім, Капыльскім раёнах.
У 1-м паўгоддзі без малога 150 тысяч рублёў накіравана на павышэнне ўзроўню пажарнай бяспекі ва ўстановах адукацыі.
Рыхтуюць да новага навучальнага года і школьныя аўтобусы. На дадзены момант іх 248. Планавы агляд паспяхова прайшлі ўжо 87% з іх. Да 20 жніўня, па словах Таццяны Апраніч, будуць гатовыя да дастаўкі вучняў і астатнія. Варта адзначыць, што школьных аўтобусаў стане больш: на дадзены момант праводзіцца цэнтралізаваная закупка яшчэ 40 штук.
Паклапоцяцца і пра бяспеку дарожнага руху па тэрыторыях, прылеглых да ўстаноў адукацыі. Да 1 жніўня правядуць іх камісійныя абследавання.
На 95% установы агульнай сярэдняй адукацыі Мінскай вобласці ўжо забяспечаны спартыўным інвентаром і абсталяваннем. У 2019/2020 навучальным годзе за кошт сродкаў абласнога бюджэту набыта паўтары тысячы пар лыжных камплектаў. Маецца спортінвентар для заняткаў гімнастыкай, акрабатыкай, аэробікай, атлетычнай гімнастыкай, а таксама для рухомых і спартыўных гульняў.
Для ўстаноў адукацыі плануецца набыць электронныя сродкі навучання, кампутарную і аргтэхніку, кампутарныя класы. А для ўстаноў прафесійнай адукацыі закупяць 14 адзінак грузавой тэхнікі, 2 трактары, 3 легкавыя аўтамабілі і 4 аўтобусы.
Робіцца ўсё неабходнае, каб установы адукацыі гасцінна расчынілі свае дзверы да Дня ведаў і сустрэлі вучняў абноўленымі і абсталяванымі для іх паспяховага навучання.
Крыніца: minsk-region.gov.by
