Заключэнне пагаднення дазволіць сфарміраваць агульны рынак на прынцыпах транспарэнтнасці, легітымнасці і ўзаемнай выгады, а таксама дапаможа ўзмацніць узаемавыгадныя гандлёва-эканамічныя сувязі.
Подпісы пад дакументам паставілі першы намеснік старшыні Мінаблвыканкама Ігар Макар і віцэ-губернатар правінцыі Гуандун Чэнь Лянсань.
Па словах Ігара Макара, у ліку асноўных мэт супрацоўніцтва - прамая кааперацыя рэгіёнаў. Прадпрыемствы вобласці ўжо наладзілі кантакты з кітайскімі партнёрамі: усе малакаперапрацоўчыя і шэраг мясаперапрацоўчых прадпрыемстваў рэгіёну маюць дазвол на пастаўку прадукцыі ў Кітай, толькі за студзень-жнівень 2019 года ў Кітай адгружана мясамалочнай прадукцыі на суму каля $17,5 млн. Праца ў гэтым кірунку будзе працягнута. А для аператыўнага рашэння ўсіх намечаных планаў бакі дамовіліся аб стварэнні сумеснай рабочай групы.
Таксама на сустрэчы з прадстаўнікамі правінцыі Ігар Макар перадаў кіраўніцтву Гуандун запрашэнне старшыні Мінскага аблвыканкама Анатоля Ісачэнкі наведаць з візітам у адказ Мінскую вобласць. Акрамя таго, ён прапанаваў у 2020 годзе правесці дні Мінскай вобласці ў Гуандуне, падчас якіх можна было б правесці бізнес-форум, канцэртную праграму і фотавыставу аб Мінскай вобласці.
Падчас візіту абмяркоўваліся і пытанні пастаўкі беларускай сельскагаспадарчай прадукцыі ў Кітай, стварэння сумеснага малакаперапрацоўчага прадпрыемства. ААТ "Слуцкі сыраробны камбінат" заключыў дагавор пастаўкі прадукцыі на $2 млн c карпарацыяй Greenland Group. Яшчэ адзін дакумент быў падпісаны з кампаніяй Shanhai Pujia Food Technology Co.
Знешнегандлёвы абарот Мінскай вобласці з Кітаем за студзень-жнівень 2019 года склаў больш за $1 млрд, у тым ліку экспарт - $335 млн. Гэта ў 2 разы вышэй у параўнанні з аналагічным перыядам 2018 года.
Крыніца: minsk-region.gov.by
