- Андрэй, што адбылося гэтай раніцай? - цікавімся ў нашага героя.
- Змяніўся з дзяжурства і адправіўся дадому. Нічога не прадвяшчала бяды. Выязджаючы на трасу М7 я ўбачыў, што адбылося ДТЗ, удзельнікамі якога сталі аўтамабілі «Ford Transit» і «Opel Vectra». Легкавы аўтамабіль ужо загарэўся. Я хутка зрэагаваў, прыадчыніў капот, зняў клемы з акумулятара, і разам з яшчэ адным кіроўцам, які таксама спыніўся, затушылі аўтамабіль. Затым я агледзеў пацярпелых. Мужчына адчуваў сябе нармальна. А вось дзяўчына скардзілася на вельмі моцны боль у руцэ. Я неадкладна наклаў шыну на руку з падручных сродкаў. Пасля чаго пад'ехалі медыкі і дзяўчыну павезлі ў бальніцу, - сціпла адказвае Андрэй.
- Вы вельмі малады чалавек. Вам ужо даводзілася аказвацца ў такой сітуацыі?
- За тры гады маёй службы ў МНС я выязджаў усяго на два ДТЗ, але першую даўрачэбную дапамогу давялося аказваць упершыню. Дзейнічаў «на аўтамаце». Напэўна, служба загартоўвае характар, - усміхаецца Андрэй.