Адрас:

222357, г. Валожын, пл. Свабоды, 2

Тэлефон прыёмнай:

+375 (1772) 5-55-72

Рэжым работы:

з 8.30 да 13.00 і з 14.00 да 17.30 па буднях

гарачая лінія: +375 (1772) 5-55-72

Беларусь гатова пастаўляць у Прыморскі край племянную жывёлу

22.09.2020

Беларусь гатова пастаўляць у Прыморскі край Расіі племянную жывёлу. Аб гэтым заявіў міністр сельскай гаспадаркі і харчавання Іван Крупко ў час перагавораў з дэлегацыяй Прыморскага края на чале з губернатарам Алегам Кажамякам, перадае карэспандэнт БЕЛТА.

"Мінсельгасхарч Беларусі робіць усё для развіцця гандлёва-эканамічных адносін з Прыморскім краем. Наш аграпрамысловы комплекс дасягнуў вялікіх поспехаў. Ён дэманструе рост і ў гэтым годзе, нягледзячы на пандэмію. Таму нам ёсць што прапанаваць. Адна з нашых прапаноў - праектаванне і будаўніцтва малочнатаварных і свінагадоўчых комплексаў, пастаўка абсталявання, - сказаў Іван Крупко. - Мы маглі б быць карыснымі адзін аднаму і ў рабоце з племянным матэрыялам. Прапануем пастаўкі племянной жывёлы малочнага і мяснога напрамку, свіней. Зацікаўлены і ў тым, каб пастаўляць насенне яравога трыцікале, яравой пшаніцы, шматгадовых траў".

Міністр таксама закрануў пытанні навучання кадраў. Штогод у арганізацыі аграпрамысловага комплексу Беларусі накіроўваюцца амаль 9 тыс. маладых спецыялістаў з вышэйшай, сярэдняй спецыяльнай і прафесійна-тэхнічнай адукацыяй. У краіне працуюць чатыры аграрныя ВНУ. На іх базе створаны вучэбна-навукова-вытворчыя цэнтры практычнага навучання, у склад якіх уключаны каледжы, эфектыўныя сельскагаспадарчыя арганізацыі і НПЦ НАН Беларусі. Паводле слоў Івана Крупко, Беларусь гатова да супрацоўніцтва з Прыморскім краем у сферы аграрнай адукацыі.

Ён таксама запрасіў прадстаўнікоў Прыморскага края на XXX Міжнародную спецыялізаваную выстаўку "Белагра-2020", якая пройдзе ў Мінску з 29 верасня па 4 кастрычніка. Мерапрыемства прымеркавана да VII Форуму рэгіёнаў Беларусі і Расіі. "Мы хацелі б прадэманстраваць дасягненні нашых прамысловых і перапрацоўчых прадпрыемстваў, Нацыянальнай акадэміі навук. Будзе магчымасць наведаць нашы прадпрыемствы, знайсці агульныя інтарэсы", - адзначыў міністр.

Прыморскі край зацікаўлены ва ўкараненні беларускіх тэхналогій у сферу АПК, адзначыў Алег Кажамяка. "Гэта датычыцца бульбаводства, вырошчвання агародніны адкрытага грунту. Тут у нас каласальны зачын у пастаўках насення, тэхналогій, перапрацоўчых ліній, якія выпускаюцца ў Беларусі. Нас цікавіць і беларуская сельгастэхніка (камбайны, трактары, пасяўныя комплексы). Яна добра сябе зарэкамендавала і адпавядае самым сучасным сусветным аналагам", - падкрэсліў ён.

Губернатар адзначыў высокую якасць беларускіх тавараў. Паводле яго слоў, цяпер абмяркоўваецца стварэнне ў Прыморскім краі гандлёвых дамоў для рэалізацыі беларускай сельгаспрадукцыі і тавараў народнага спажывання. "І сыры, і масла, і каўбасныя вырабы, і сухое малако для далейшай перапрацоўкі - усё гэта мае павышаны попыт у насельніцтва нашага рэгіёна. Людзі давяраюць прадукцыі беларускіх вытворцаў, яна карыстаецца папулярнасцю, - звярнуў увагу Алег Кажамяка. - Мы накіруем прадстаўнікоў гандлёвых сетак на "Белагра", каб яны вывучылі магчымасці паставак прадукцыі".

Тавараабарот сельскагаспадарчай прадукцыі і прадуктаў харчавання арганізацый Беларусі і Прыморскага края ў студзені-ліпені склаў $1,44 млн (рост на 88,9 працэнта да аналагічнага перыяду 2019 года), у тым ліку экспарт - $1,34 млн (рост на 91 працэнт). У расійскі рэгіён з Беларусі экспартаваліся масла, сухое малако, тварог, мяса і мясапрадукты, у тым ліку каўбасныя вырабы, а таксама кандытарскія вырабы. Асноўныя экспарцёры: ААТ "Віцебскі мясакамбінат", ВУП "Калінкавіцкі малочны камбінат", ААТ "Лідскі МКК", ААТ "Бабуліна крынка". З Прыморскага края ў Беларусь завозілі рыбу і рыбапрадукты.

Крыніца: belta.by