Якія б палітычныя падзеі, найноўшыя вірусы ці прыродныя катаклізмы не ўскалыхвалі грамадства, жыццё, незважаючы ні на што, працягваецца. І пацвярджэнне таму – немаўляты на руках у юных і прыгожых матуль.
Вядома, што з 4 красавіка да 17 жніўня гінекалагічны корпус райбальніцы быў перапрафіляваны пад часовы інфекцыйны шпіталь, дзе аказвалі дапамогу хворым з каранавіруснай інфекцыяй. Да вялікай радасці спецыялістаў і асабліва цяжарных жанчын, якім зусім не хочацца ехаць на роды ў іншыя гарады, аддзяленне вось ужо два месяцы, як аднавіла работу. За гэты перыяд з дапамогай валожынскіх медыкаў на свет з’явіліся 33 дзіцяці. Акушэрка Таццяна Францаўна Праабражэнская адзначыла: гэта добрая лічба. Яшчэ да сітуацыі з каранавірусам за падобныя перыяды ў аддзяленні прымаліся ад 20 да 30 родаў. Напярэдадні Дня маці, нібы самыя каштоўныя падарункі для любячых матуль, тут нарадзіліся тры хлопчыкі і адна дзяўчынка.
У святочны дзень, па даўно ўсталяванай традыцыі, у радзільнае аддзяленне завітала старшыня раённай арганізацыі “Беларускі саюз жанчын”, дырэктар тэрытарыяльнага цэнтра сацыяльнага абслугоўвання насельніцтва Галіна Рай. Яна прывезла маладым жанчынам, якія толькі-толькі ўнеслі свой уклад у паляпшэнне дэмаграфічнай сітуацыі на Валожыншчыне, і іх маленькім нашчадкам падарункі.
Нам пашанцавала застаць у палатах Вольгу Сухадолец з сынам Максімам, Дар’ю Балашэнка з сынам, імя кому яшчэ выбіраецца, і Марыну Брудар з дачушкай Алісай. У Вольгі ўжо падрастае дачка Ксенія, а Даша і Марына пакуль радуюцца першынцам.
Жанчыны з удзячнасцю і павагай выказаліся адносна работы ўрачоў, акушэрак, медыцынскіх сясцёр і санітарак. Сапраўды, аддзяленне шыкоўна аздоблена, у палатах утульна і светла. Парадзіхам прадастаўлена права на платнай аснове
займаць месцы ў палатах класа люкс (аплата за карыстанне – ад 7 да 25 рублёў). Дарэчы, як высветлілася, многія супрацоўніцы аддзялення – прыклад для іншых жанчын. Сярод іх даволі высокі працэнт шматдзетных.
Валянціна КРАЎНЕВІЧ,
фота аўтара