Пажылыя людзі заўсёды маюць патрэбу ў дапамозе. Бо з узростам усё цяжэй і цяжэй становіцца выконваць неабходную працу. Вось у рамках акцыі «Моладзь за бяспеку» актывісты клуба юных выратавальнікаў-пажарных «Ліквідацыя» з сярэдняй школы №2 г. Валожына вырашылі аказаць дапамогу некалькім жыхаркам горада, якія найбольш маюць патрэбу ў іх дапамозе.
Працы, вядома, было вельмі шмат. Але, калі з'яўляецца жаданне дапамагчы, цяжкасці не страшныя. Таму з выдатным настроем усе дружна прыняліся за працу. За некалькі дзён актывісты дапамаглі гародніну з градак прыбраць, ускапаць агарод, кветнікі ад сухіх кветак і травы ачысціць і яблыкі на зіму нарыхтаваць, і дровы скласці. Падзякі за аказаную дапамогу не было мяжы. Вядома, аказаная дапамога прыйшлася як нельга дарэчы, але ўвага да пажылых людзей даражэй за ўсё.