Дзяржаўная ўстанова “Валожынская цэнтральная раённая бібліятэка” далучаецца да мерапрыемстваў, прысвечаных гісторыі і культуры вобласці. Аддзел бібліятэчнага маркетынгу Валожынскай цэнтральнай раённай бібліятэкі прадстаўляе праект “80 цікавых фактаў аб Мінскай вобласці”, у рамках якога мы будзем публікаваць займальныя, а часам і нечаканыя факты аб гісторыі, прыродзе, людзях Мінскай вобласці і многім іншым.
Сачыце за нашым праектам і ў вас з’явіцца яшчэ 80 падстаў больш любіць сваю малую Радзіму і ганарыцца ёй.
ФАКТ 7.
Самы наведвальны зімой раён краіны.
На званне лідэра па наведвальнасці турыстамі ў навагоднія святы прэтэндуе Капыльскі раён дзякуючы ўнікальнаму беларускаму народнаму абраду "Калядныя цары", які існуе толькі ў вёсцы Семежава.
Гісторыя абраду вядзе пачатак з XVIII стагоддзя, калі недалёка ад вёскі Семежава стаялі часці царскай арміі. Як сведчыць мясцовае паданне, у дні святкавання Новага года па старым стылі (Юліянскі каляндар) салдаты і афіцэры хадзілі па дварах, паказваючы вясёлы паказ, за што гаспадары адорвалі іх пачастункам. Пасля таго, як атрад пакінуў вёску, мясцовыя жыхары не толькі захавалі традыцыю, але і развілі яе ва ўнікальнае каляднае дзейства.
Праводзіцца абрад у Шчодры вечар ("Шчадрэц", "Шчодрык") – з 13 на 14 студзеня.
У 2009 годзе абрад "Калядныя цары" увайшоў у Спіс нематэрыяльнай культурнай спадчыны ЮНЕСКА.
ФАКТ 8.
Беларускі дзяржаўны музей народнай архітэктуры і побыту «Строчыцы» і гарадзішча на рацэ Менцы.
...Зусім недалёка ад Мінска, у 4-х кіламетрах на паўночны захад ад сталіцы, паміж вёскамі Азярцо і Строчыца, дзе злучаюцца воды Пцічы і Менкі, размясціўся гэты унікальны музей, які пачаў працаваць у 1976 годзе.
Экспазіцыя знаёміць з матэрыяльнай культурай беларусаў розных раёнаў: Паазер'я, Падняпроўя, Цэнтральнай Беларусі, Усходняга і Заходняга Палесся, Падзвіння. Кожны рэгіён прадстаўлены фрагментам тыповага паселішча XIX – пачатку XX стст. з традыцыйнай забудовай (гаспадарчыя і культавыя пабудовы, сядзібы і двары, вытворчыя будынкі, малыя формы і мемарыяльныя помнікі).
А побач з музеем знаходзіцца старажытнае гарадзішча, з якога, на думку многіх гісторыкаў, і вядзе свой пачатак наша сталіца...
