Дзяржаўная ўстанова “Валожынская цэнтральная раённая бібліятэка” далучаецца да мерапрыемстваў, прысвечаных гісторыі і культуры вобласці.
Аддзел бібліятэчнага маркетынгу Валожынскай цэнтральнай раённай бібліятэкі прадстаўляе праект
“80 ЦІКАВЫХ ФАКТАЎ АБ МІНСКАЙ ВОБЛАСЦІ”
у рамках якога мы будзем публікаваць на сайце Валожынскага райвыканкама займальныя, а часам і нечаканыя факты аб гісторыі, прыродзе, людзях Мінскай вобласці і многім іншым.
Сачыце за нашым праектам і ў вас з’явіцца яшчэ 80 падстаў больш любіць сваю малую радзіму і ганарыцца ёй.
ФАКТ 74
КАТАЛІЦКІ ХРАМ У БАГУШЭВІЧАХ
Багушэвіцкі касцёл Святой Тройцы – помнік архітэктуры ў стылі неаготыкі. Пабудаваны ў сярэдзіне ХІХ стагоддзя як сямейная капліца ўладальнікаў Багушэвіцкай сядзібы Свентаржэцкіх. Касцёл размешчаны ў цэнтры населенага пункта, на гарадзішчы.
Храм у аграгарадку Багушэвічы занесены ў спіс гісторыкакультурных каштоўнасцей Рэспублікі Беларусь.
ФАКТ 75
БУДСЛАЎСКІ ФЭСТ УКЛЮЧАНЫ Ў СПІС СУСВЕТНАЙ СПАДЧЫНЫ ЮНЭСКА
28 лістапада, камітэт ЮНЭСКА па ахове нематэрыяльнай культурнай спадчыны адзінагалосна вырашыў уключыць урачыстасць у гонар шанавання іконы Маці Божай Будслаўскай у спіс нематэрыяльнай культурнай спадчыны чалавецтва.
Свята ў Будславе (Мядзельшчына) у гонар цудадзейнага абраза Маці Божай Будслаўскай вядомае з XVII стагоддзя. Абраз быў падараваны Папам Рымскім Клімэнтам VIII мінскаму ваяводу Яну Пацу ў 1598г, у 1613г. быў падараваны будслаўскаму кляштару бэрнардынцаў. Маці Божая Будслаўская лічыцца апякункай Беларусі, Папа Рымскі Ян Павел II афіцыйна прызнаў яе патронкай Мінска-Магілёўскай архідыяцэзіі.
ФАКТ 76
КАФЕДРАЛЬНЫ САБОР У БАРЫСАВЕ
Завітаўшы ў Барысаў знайдзіце гадзіну-другую і наведайце Кафедральны сабор Уваскрэшанне Хрыстова. Сабор, які знаходзіцца ў гістарычнай частцы горада, з’яўляецца помнікам рэтраспектыўна-рускага (псеўдарускага) стылю, у якім прысутнічаюць прыкметы стылізацыі формаў маскоўскага царкоўнага будаўніцтва XVII стагоддзя. Ён надае асобы каларыт усяму комплексу, а сама плошча з’яўляецца любімым месцам барысаўчан.
