У 2020 годзе мы рады кожнаму наведвальніку, кожнаму турысту, які нягледзячы на цяжкасці, наведаў Івянецкі музей традыцыйнай культуры.
«Цуд на Каляды» – гэта адмысловая праграма для ўсіх гасцей музея.
На прыкладзе групы школьнікаў 4 –га класа раскажам пра тое, які цуд чакаў дзяцей.
Пасля доўгай дарогі дзеці з задавальненнем паласаваліся цукеркамі, якімі пачаставала «Шчодрая» – гід па цудоўным падарожжы. У экспазіцыі дзеці не толькі пазнаёміліся з гісторыяй Івянца і рамёствамі, а і даведаліся, як рыхтавалі святочны стол на Каляды. У навагодняй фотазоне сфатаграфаваліся, а на паштоўках шукалі вобразы Дзеда Мароза і Снягуркі.
Сапраўдным цудам стаў батлеечны спектакль «Цар Ірад», які сцвердзіў, што дабро заўжды перамагае!
У ткачыхі і ганчара дзеці даведаліся, чым займаліся нашы продкі перадкаляднымі вечарамі, сталі удзельнікамі майстар – класаў.
У Музеі местачковага побыту пазнаёміліся з тым, як жылі нашы продкі.
Пасля насычанай дзеямі праграмы гледачы падсілкаваліся каляднымі блінцамі ды гарбатай на зёлках.
А далей музычна – гульнёвая праграма, дзе гульні, скокі, музыка ды іншыя забаўкі.
