Нядаўна ў Мінску прайшло ўрачыстае мерапрыемства, дзе ўшаноўвалі лепшыя маладзёжныя экіпажы і маладых вадзіцеляў, якія паказалі высокія вынікі ва ўборачнай кампаніі 2017 года.
Перадавікоў жніва чакала шырокая праграма. Спачатку — наведванне Мінскага завода колавых цягачоў, знаёмства з вытворчасцю і тэхнікай. Экскурсія выдалася насычанай і карыснай, бо атрыманая інфармацыя спатрэбіцца ў прафесійнай дзейнасці. Яшчэ адны ўдзельнікі мерапрыемства — кіраўнікі раённых арганізацый прафсаюза АПК і тэрытарыяльных камітэтаў ГА «БРСМ» — паглядзелі экспазіцыю ў Нацыянальным гістарычным музеі.
У другой палове дня адбыўся абласны турнір па боўлінгу сярод маладзёжных лідараў уборачнай па выніках акцыі «Маладая Міншчына — за ўраджай!». Такое завяршэнне сезона стала добрай традыцыяй і праходзіць шосты год запар. Падчас мерапрыемства прайшла цырымонія ўзнагароджання дыпломамі і ўручэнне грашовых прэмій. Лепшымі работнікамі Валожынскага раёна сталі механік ААТ «Лоск» — Уладзіслаў Ярота, механізатар ААТ «Агра-Дубінское» — Аляксей Барэйка і Аляксандр Макарэвіч — вадзіцель КСУП «Падбярэззе».
Заліковая гульня ў боўлінг прайшла ў сяброўскай атмасферы, прадстаўнікі гаспадарак з усёй вобласці знаёміліся з калегамі, размаўлялі, абменьваліся вопытам. Але на дарожцы ігракам трэба было паказаць спрыт, трапнасць, праявіць свае спартыўныя здольнасці, уменне быць камандай. І тут хлопцы з нашага раёна адстаялі права быць у кагорце лепшых — каманда заняла другое месца.
