Валожынскі раённы
выканаўчы камітэт

У суботу на Валожыншчыне прайшло самае, бадай, урачыстае свята ў календары работнікаў сельскай гаспадаркі – раённыя “Дажынкі-2016”. Мерапрыемства наладзілі не ў райцэнтры, а бліжэй да зямлі-карміцелькі і працавітых хлебаробаў. Герояў сёлетняга жніва гасцінна сустракаў аграгарадок Пяршаі – цэнтральная сядзіба адной з самых моцных гаспадарак нашага рэгіёну.

Святкаванне пачалося задоўга да афіцыйнай часткі ўрачыстасці. На вуліцы перад мясцовым Домам культуры разгарнулася вялікая рыначная пляцоўка з гандлёвымі месцамі. Жыхары і госці аграгарадка захапляліся вырабамі, прадстаўленымі на выставе дэкаратыўна-прыкладнога мастацтва і майстроў-рамеснікаў. Не па-асенняму цёплае паветра поўнілася жартамі, смехам, музыкай і звонкімі галасамі выступоўцаў: з работнікамі сельскагаспадарчых прадпрыемстваў шчодра дзяліліся добрым настроем самадзейныя артысты раёна, а таксама творчыя калектывы ўстаноў культуры Валожына і сельсаветаў. У фае будынка адміністрацыі КСУП “Пяршаі-2014” таксама было людна: тут не толькі рэгістравалі ўдзельнікаў “Дажынак”, але і ладзілі выставу-продаж-дэгустацыю прадукцыі прадпрыемствы-вытворцы Валожыншчыны, фермерскія гаспадаркі раёна. Цэнтральнае месца ў багатай экспазіцыі па праве займалі караваі з ураджаю новага года, якія клапатліва даставілі на свята кіраўнікі гаспадарак.

Старт мерапрыемству даў старшыня райвыканкама Мікалай Анатольевіч Астрэйка. Кіраўнік раёна павітаў працаўнікоў аграпрамысловага комплексу, жыхароў і гасцей аграгарадка, адзначыў заслугі ўсіх працаўнікоў вёскі, а таксама спецыялістаў і кіраўнікоў, якія ўмела арганізавалі ўборку ўраджаю. У кампаніі было задзейнічана 100 зернеўборачных камбайнаў. У сярэднім нагрузка на адзін камбайн склала 244 гектары. На дасушцы збожжа працавалі 22 зернесушыльныя комплексы.

Клапатліва пакланіўшыся кожнаму каласку, хлебаробы сабралі 60 тысяч 287 тон збожжа пры сярэдняй ураджайнасці 28,1 цэнтнера з гектара. У самай паспяховай гаспадарцы сёлетняй уборачнай кампаніі – СГУ “Бабровічы” УП “Мінскаблгаз” – валавы збор зерня склаў 4561 тону пры ўраджайнасці 47,5 цэнтнера з гектара. На адзін балагектар пасеянага тут атрымалі 140,5 кілаграма збожжа, выкананы дзяржаўны план продажу ўраджаю… Не дзіва, што гэта прадпрыемства і стала пераможцам раённага спаборніцтва сярод сельскагаспадарчых арганізацый. Пад гучныя апладысменты прысутных старшыня райвыканкама ўручыў дружнаму калектыву, які ўзначальвае Генадзь Уладзіміравіч Бычкоўскі, Дыплом і грашовую прэмію.

Наступным этапам раённага свята стала ўзнагароджанне пераможцаў жніва. Мікалай Анатольевіч уручыў Дыпломы і грашовыя прэміі за дасягненне высокіх паказчыкаў на ўборцы ўраджаю збожжавых і зернебабовых культур лепшым камбайнерскім экіпажам. Уладальнікамі ўзнагарод сталі Іван Саломка і Арцемій Ліннік з ААТ “Агра-Дубінское” (камбайн “Дон-1500Б”, намалот склаў 760 тон), пяршайскія тысячнікі Раман Салаўёў і Вадзім Машарскіс (“Мега-204”, 1013 тон), прадстаўнікі ААТ “Багданаўскае” Аляксей Мігановіч і Міхаіл Тамашэвіч (“Мега-350”, 977 тон), сямейны экіпаж КСУП “Сугвазды-агра” ў складзе Аляксандра і Сяргея Звярко (“КЗС-10”, 712 тон). Горача віталі на сцэне карыфеяў сёлетняга жніва, якія далёка перасягнулі тысячатонны рубеж – пяршайцаў Анатоля Жамоздзіка і Вадзіма Адамовіча (“Лексіён-560”, 1544 тоны), рупліўцаў ТАА “Тарасава” братоў Яўгена і Паўла Палешчукоў (“Лексіён-580”, 1522 тоны) і прадстаўнікоў гэтай жа гаспадаркі Віктара Пралата і Сяргея Аніську, якія не толькі намалацілі на камбайне “Лексіён-770” 1329 тон зерня, але і самыя першыя ў раёне сёлета сталі “тысячнікамі”.

Цырымонію ўзнагароджання лепшых вадзіцеляў на адвозцы зерня, машыністаў зернеачышчальных і зернесушыльных комплексаў, механізатараў, задзейнічаных на ўборцы саломы і церабленні лёну, правёў першы намеснік старшыні райвыканкама – начальнік упраўлення сельскай гаспадаркі і харчавання Аляксандр Мікалаевіч Шыфрын. Сярод перадавікоў-вадзіцеляў – Аляксей Якубоўскі з КСУП “Пяршаі-2014”, які на аўтамабілі “ГАЗ-САЗ-3507” перавёз 951 тону ўраджаю, прадстаўнік КСУП “Сакаўшчына-агра” Аляксандр Русіновіч з паказчыкам 890 тон і зноў-такі пяршаец Аляксандр Шаплоў, на рахунку якога 765 тон сабранага хлеба. Лепшымі кіроўцамі шматтонных “МАЗаў” прызнаны Юрый Маркевіч з Пяршаяў (2018 тон), а таксама работнікі КСУП “Сугвазды-агра” Валерый Шэўчык і Аляксандр Мамонька, якія перавезлі 2014 і 1829 тон адпаведна.

Ушанавалі Дыпломамі і прэміямі старшага аператара звяна па дапрацоўцы і ачыстцы зерня ТАА “Тарасава” Аляксандра Раманчыка, яго калег Аляксандра Анікіна з СГУ “Бабровічы” УП “Мінскаблгаз” і Аляксандра Макрыцкага з ААТ “Лоск”. Прызнаным лідарам сярод механізатараў з паказчыкам на ўборцы саломы ў 1898 тон стаў пяршайскі трактарыст Дзмітрый Санкоўскі. На яго раўняўся і калега з гэтай жа гаспадаркі Дзмітрый Гуд (1343 тоны). Тройку прызёраў спаборніцтва замкнуў механізатар ААТ “Агра-Дубінское” Іван Сцепаненка – на яго рахунку 1312 тон саломы. Лепшым жа механізатарам ільноўборачнага камбайна прызнаны работнік ААТ “Валожынскі льнокамбінат” Дзяніс Сасноўскі, які працерабіў культуру на плошчы 92 гектары.

З падзячным словам да хлебаробаў звярнуліся і шаноўныя госці раённых “Дажынак” – намеснік кіраўніка адміністрацыі Савецкага раёна г. Мінска Аляксандра Вялічка, начальнік аддзела ідэалагічнай работы, культуры і па справах моладзі Уздзенскага райвыканкама Алена Спірына і кіраўнік аднаго з сельгаспрадпрыемстваў Уздзеншчыны Дзмітрый Лушаркоў.

Канцэртнай праграмай віталі герояў жніва і ўсіх удзельнікаў свята заслужаны аматарскі калектыў Рэспублікі Беларусь фальклорны гурт “Гасцінец” Ракаўскага цэнтра народнай творчасці, народны ансамбль народнай песні «Сваякі», ансамбль польскай песні, ансамбль народнага гумару «Дубінскія фанабэры», народны хор ветэранаў працы “Спяваючыя сэрцы”, выступалі і іншыя таленавітыя выканаўцы.

«Працоўная Слава»