Генеральным пракурорам Рэспублікі Беларусь у красавіку бягучага года ўзбуджана крымінальная справа па фактах здзяйснення нацысцкімі злачынцамі, іх памагатымі ў гады Вялікай Айчыннай вайны і ў пасляваенны перыяд на тэрыторыі Беларусі і іншых дзяржаў генацыду – дзеянняў па планамерным знішчэнні жыхароў Беларусі, шляхам масавых забойстваў, наўмыснага стварэння жыццёвых умоў, разлічаных на іх фізічнае знішчэнне, правядзення карных аперацый, знішчэння населеных пунктаў разам з жыхарамі, гвалтоўнай дэпартацыі для выканання прымусовых работ, стварэння месцаў прымусовага ўтрымання насельніцтва, канцэнтрацыйных лагераў і лагераў смерці.
Пракуратурай Валожынскага раёна сумесна з Валожынскім РАСК падчас расследавання гэтай крымінальнай справы дапытана больш за 50 асоб, у тым ліку больш за 20 былых вязняў, даследаваны архіўныя матэрыялы, агледжаны шэраг мемарыяльных комплексаў.
Пракуратурай раёна ва ўзаемадзеянні з Валожынскім РАУС і мясцовымі выканаўчымі органамі ўстаноўлены відавочцы фактаў спалення вёсак Валожынскага раёна разам з жыхарамі адпаведных населеных пунктаў. З дадзенымі грамадзянамі праведзены неабходныя следчыя дзеянні, накіраваныя на поўнае і ўсебаковае даследаванне абставінаў таго, што адбылося.
У той жа час папярэдняе расследаванне крымінальнай справы не завершана. Трэба будзе яшчэ выканаць вялікі аб'ём працы.
Пракуратура Валожынскага раёна звяртаецца да ўсіх жыхароў раёна з просьбай паведаміць у пракуратуру раёна звесткі аб раней невядомых спаленых і разбураных у гады Вялікай Айчыннай вайны населеных пунктах раёна, фактах знішчэння насельніцтва, а таксама аб іншых фактах праявы генацыду ў аналізуемы перыяд часу.
Пракурор раёна Аляксандр Ляўковіч
