ЗЯЛЁНЫ МАРШРУТ «ВАЛОЖЫНСКIЯ ГАСЦIНЦЫ»
Зялёны маршрут стартуе ў невялікім мястэчку Валожын, дзе турысты знаёмяцца з тыповай планіроўкай горада XVIII – першай паловай XIX стагоддзяў з цэнтрам у выглядзе Рынкавай плошчы, якая сфармавалася на старажытным гандлёвым шляху, аглядаюць палац графаў Тышкевічаў, касцёл Святога Юзафа, драўляную царкву Святых Констанцiна і Алены, ешыву і іншыя помнікі. Наступным аб'ектам маршруту можа стаць Івянец, дзе захавалася тыповая планіроўка мястэчка XVII-XVIII стагоддзяў з ярка выражаным цэнтрам у выглядзе сістэмы плошчы, вуліц і скрыжаванняў.
Тут турысты змогуць палюбавацца касцёлам і кляштарам францысканцаў - адным з найбольш выразных помнікаў сталага барока ў Беларусі, Аляксееўскім касцёлам - помнікам неаготыкі, сучаснай царквой Ефрасінні Полацкай. У невялікім старадаўнім мястэчку Ракаў можна ўбачыць Праабражэнскую царкву – помнік архітэктуры пераходнага перыяду ад барока да класіцызму, рэшткі земляных умацаванняў замка XVII стагоддзя, касцёл – помнік архітэктуры неаготыкі. У в. Падневічы турысты агледзяць капліцу, пабудаваную ў 1852 годзе ў неакласічным стылі. Маршрут праходзіць праз в. Вішнева, дзе знаходзіцца ўнікальны касцёл Найсвяцейшай Дзевы Марыі і Казьма-Дзям'янаўская царква рэтраспектыўна-рускага стылю. У зялёны маршрут уключаны таксама наведванні вёскі Гірэвічы, Багданаў, Лоск, Кіявец. Маршрут можа завершыцца на хутары «Барок», дзе знаходзіцца калекцыя прадметаў дэкаратыўна-прыкладнога мастацтва і народных інструментаў.
ВЕЛАСІПЕДНЫ МАРШРУТ «ПА ВАЛАЖЫНСКIХ ГАСЦIНЦАХ»
Веламаршрут пракладзены ад станцыі Багданаў праз увесь Валожынскі раён да станцыі Радашковічы. Працягласць маршруту складае каля 150 км. Маршрут уключае самыя цікавыя месцы Валожынскага краю: экамузеі, аграсядзібы, прыродныя і гістарычныя славутасці. Маршрут размешчаны па еўрапейскіх стандартах, абсталяваны паказальнікамі напрамку руху, інфармацыйнымі шчытамі, абсталяваны 3 зоны адпачынку, распрацаваны даведнік, GPS-трэк.
Гэтак жа па тэрыторыі раёна праходзіць некалькі маркіраваных веламаршрутаў, якія з'яўляюцца часткай транс'еўрапейскага веламаршруту EuroVelo-2.
GPS-трэк вела-маршруту «Валожынскія гасцінцы»
ВОДНЫ МАРШРУТ «НА БАЙДАРКАХ ПА ІСЛАЧЫ»
Бягучая ў вузкім каньёне сярод іглічных лясоў Іслач - адзін з найбольш папулярных маршрутаў у аматараў воднага турызму ў Беларусі. Звілістасць ракі і мноства перашкод не дадуць засумаваць у паходзе. Хуткая плынь і высокія берагі гарантуюць вострыя адчуванні і яркія ўражанні.
Сплав можна пачаць ад месца ўпадзення ў Іслач правага прытоку р. Яршоўка, у вусці якога размешчаны хутар Міхалова.
Маршрут: х.Міхалова (х.Арлоўшчына) – в.Ківец – в.Тупальшчына – в.Падневічы – в.Баравікоўшчына – урочышча Вялае – в.Люцінка – в.Яцкова – в.Белакорац.
Што паглядзець на маршруце?
- Вёска Кіявец – царква Святой Тройцы і рэшткі вадзянога млына
- Вёска Падневічы, урочышча Тупальшчына – капліца-пахавальня Жаброўскіх, магіла В.Дуніна-Марцінкевіча
- Урочышча Вялае – руіны графскага палаца Тышкевічаў
НАЛІБОКСКАЕ КАЛЬЦО: ВОДНЫЯ, КОННЫЯ І ВЕЛАСІПЕДНЫЯ ПРАГУЛКI
Гэты маршрут прызначаны для актыўных турыстаў, якія хочуць пазнаёміцца з прыродай Налібоцкага краю бліжэй. На гэтым маршруце вы зможаце палюбавацца прыродай як з вады ці веласіпеда, так і з коннай павозкі.
Адпраўным пунктам маршруту выступае аграэкасядзіба «Налібоцкія васількі», размешчаная ў в. Белакорац на паўночнай мяжы дзіўнай Налібоцкай пушчы.
У сядзібе вы можаце азнаёміцца з экспазіцыяй экамузея коннага транспарту (вазы, сані), коннай амуніцыі і прыладдзя.
Далей наш шлях ляжыць да сядзібы «За масточкам», якая размешчана на беразе маляўнічага Сакаўшчынскага вадасховішча. Тут можна прайсці навучанне па падводным плаванні і рыбалцы або адправіцца ў водны паход на лодцы па Заходняй Бярэзіне.
Недалёка ад сядзібы на беразе вадасховішча знаходзіцца пляцоўка для назірання за птушкамі.
ЛАСКУТНАЯ КОЎДРА КАНФЕСІЙ ВАЛОЖЫНА
Валожын, які вырас на мяжы Налібоцкай пушчы і шырокіх земляробчых раёнаў, заўсёды быў скрыжаваннем важных дарог. Горад бурліў жыццём, быў цэнтрам гандлю і засяляў яго пярэсты люд розных нацыянальнасцяў і канфесій. Наш маршрут як коўдра збірае ў сабе невялікія фрагменты некалі велічных храмаў і знакамітай на ўвесь свет духоўнай школы. Хто прыходзіў сюды ў пошуках адказаў на галоўныя пытанні? Як і ў іншых беларускіх мястэчках – беларусы, яўрэі, палякі… Людзей шмат, усе розныя, але жылі мірна, не гледзячы на тое, што размаўлялі на розных мовах, ды і маліліся ў розных храмах.
Што паглядзець?
- касцёл Святога Юзафа
- Палацава-паркавы комплекс Тышкевічаў
- Валожынская ешыва
- Яўрэйскія могілкі
- Царква Святых Канстанціна і Алены
ІВЯНЕЦ – ГОРАД МАЙСТАРАЎ
Гарадскі пасёлак Івянец, які размясціўся на маляўнічых берагах р. Волмы, добра знаёмы як аматарам гісторыі і архітэктуры, так і знатакам беларускай керамікі. Івянец ва ўсе часы славіўся кірмашамі - тут гандлявалі збожжам, ільном, жывёлай, вырабамі з дрэва, жалеза і гліны. Тут здаўна здабывалася якасная гліна. Гандлёвыя сувязі садзейнічалі развіццю рамёстваў – ганчарнай справы, бондарства, ткацтва, разьбы па дрэве.
На маршруце «Горад майстроў» вы ўбачыце два цудоўныя касцёлы – чырвоны і белы, як іх называюць мясцовыя жыхары, і наведайце музей традыцыйнай культуры, дзе даведаецеся пра традыцыі рамяства.
ХЛЕБА І ВІДОВІШЧАЎ: ВЫТОКІ БЕЛАРУСКАЙ ОПЕРЫ, ЛІТАРАТУРЫ І КУЛЬТУРЫ
Маршрут «Хлеба і відовішчаў: вытокі беларускай оперы, літаратуры і кухні» – гэта своеасаблівы тунэль часу, які дае магчымасць патрапіць у XIX стагоддзе, далучыцца да побыту шляхецкай сядзібы, прыадкрыць сакрэты прыгатавання традыцыйных страў і прадставіць як стваралася новая беларуская літаратура, нараджалася нацыянальная опера.
Што паглядзець?
- Эка музей традыцыйнай выпечкі і мясцовых раслінных водараў «Аптэчка прыемная» (аграсядзіба «Налібоцкі кныш»)
- Экспазіцыі, прысвечаныя жыццю і творчасці В. Дуніна-Марцінкевіча (аграсядзіба «Налібоцкі кныш»)
- Месца дома, у якім жыў В. Дунін-Марцінкевіч
- Могілкі ў в. Тупальшчына – магіла В. Дуніна-Марцінкевіча
ПЧАЛІНАЯ СУСВЕТНАЯ
На маршруце «Пчаліны сусвет» вы не толькі падсаладкуеце сабе жыццё смачнымі і карыснымі прадуктамі пчалярства, але і даведаецеся аб традыцыях бортніцтва ў Беларусі ад вытокаў да сучаснасці, строгай іерархіі пчалінай сям'і і падзеле функцый, працэсе збору пылка і вытворчасці мёда, прыладзе вулля, а ў завяршэнне – зможаце аднавіць свае сілы, адпачыўшы ва ўнікальным апі-доміку (аграсядзіба «Мір Пчол», аграсядзіба «Мядовая каралева»).
ПАДАРОЖЖА Ў СВЕТ ПРЫРОДЫ І МУЗЫКІ
У гэтым маршруце спляліся разам грацыёзнасць коней, духмянасць кветак і гукі дуды. Займальнае падарожжа ў свет прыроды і музыкі будзе цікавым і дарослым, і дзецям.
Пачынаецца маршрут з сядзібы «Коні-поні», дзе галоўная тэма - гэта коні.
У сядзібе ёсць кантактны заапарк, дзе можна бліжэй пазнаёміцца з поні, казлянятамі, ослікамі, ламамі, свінкамі, трусамі і пачаставаць іх карыснымі прысмакамі.
Затым мы ідзём у сядзібу «Экафлора», дзе пагрузімся ў цудоўны свет пахучых кветак.
А далей iдзем у госці да чалавека-аркестра! У дом, дзе дрэва ператвараецца ў гук… Алесь Лось – этнограф і рэстаўратар, які стаяў ля вытокаў адраджэння беларускай дуды і іншых інструментаў, пастаноўшчык батлеечных спектакляў і гасцінны гаспадар аграсядзібы «Хутар Дудара».
Тут можна наведаць унікальны музей старажытных народных музычных інструментаў (дуды, флейты, цымбалы, ліры, гармонікі, акардэоны, скрыпкі), даведацца пра гісторыю іх паходжання і нацешыцца незвычайным гучаннем. У сядзібе праводзяцца майстар-класы па саломапляценні, выцінанцы, вырабе народных інструментаў, урокі ігры на скрыпцы, дудзе і іншых інструментах, навучанне старажытным народным танцам і многае іншае.
РАКАЎСКАЯ ЦЫВІЛІЗАЦЫЯ
У Ракаве і яго наваколлях заўсёды бурліла творчая энергія, якая ў розныя часы мела рознае ўвасабленне: ідэальныя формы ганчарных вырабаў і не менш ідэальны па форме жаночы бюстгальтар, звонкі радзівілаўскі крышталь, навуковыя творы Мар'яна Здзехоўскага і музыка Міхала Грушвіцкага, непаўтор да гандлю і сферы паслуг у цэлым у часы савецка-польскай мяжы і многае-многае іншае…
Нягледзячы на такія розныя напрамкі, нязменнай ва ўсе часы заставалася сіла гэтай творчай крыніцы, якая сілкуе Ракаўскую зямлю і дагэтуль, у чым вы можаце пераканацца, пабываўшы на маршруце «Ракаўская цывілізацыя». Вы даведаецеся ў чым унікальнасць Ракаўскай керамікі і вырабаў са шкла і крышталю, якая сувязь у Ракава з адным з найважнейшых элементаў жаночай бялізны, чаму Ракаў называлі «Літоўскімі Афінамі» і як так атрымалася, што ў маленькім мястэчку ў 1920-я гады было 126 аўтамабіляў, 134 крамы, 96 рэстаранаў.
Што паглядзець?
- Музей-галерэя Ф.Янушкевіча
- Спаса-Праабражэнская царква
- Касцёл Маці Божай Ружанцовай і Святога Дамініка
- Гарадзішча
- Яўрэйскія могілкі
- Творчая майстэрня «Іслач»
Крыніца: Упраўленне па адукацыі, спорце і турызме
Валожынскага райвыканкама
