Міністэрства адукацыі зацвердзіла інструкцыю аб правядзенні выхаваўчай работы педагагічнымі работнікамі ў пазаўрочны час з навучэнцамі. Адпаведная пастанова Мінадукацыі №332 ад 22 верасня 2022 года афіцыйна апублікавана на Нацыянальным прававым інтэрнэт-партале.
Інструкцыяй агаворваецца, што выхаваўчая работа ў пазаўрочны час — мэтанакіраваная, сістэматычная і запланаваная дзейнасць педработнікаў, у тым ліку прафесарска-выкладчыцкага складу, накіраваная на фарміраванне ў навучэнцаў пачуцця патрыятызму, грамадзянскасці, павагі да памяці абаронцаў Айчыны, закону і правапарадку, працы і старэйшага пакалення, беражлівых адносін да гісторыка-культурнай спадчыны і традыцый беларускага народа, стварэнне ўмоў для самавызначэння, сацыялізацыі і самарэалізацыі асобы навучэнца.
Выхаваўчая праца, у прыватнасці, са школьнікамі ў пазавучэбны час арганізуецца ў рэжыме шасцідзённага тыдня, які ўключае ў сябе пяцідзённы навучальны тыдзень і шосты школьны дзень, у які праводзяцца ў тым ліку спартыўна-масавыя, турыстычныя мерапрыемствы, экскурсіі.
Таксама агаворваюцца абавязкі класнага кіраўніка, куратара вучэбнай групы. Адзначаецца, што яны садзейнічаюць адаптацыі навучэнцаў ва ўстанове адукацыі, стварэнню спрыяльнага псіхалагічнага клімату і фарміраванню згуртаванага класнага калектыву, калектыву вучэбнай групы. Разам з законнымі прадстаўнікамі непаўналетніх навучэнцаў удзельнічаюць у планаванні іх адпачынку і аздараўлення ў перыяд канікул.
На класных, куратарскіх гадзінах разглядаюцца пытанні падтрымання дысцыпліны, захавання правілаў унутранага распарадку для навучэнцаў, вынікаў вучэбнай дзейнасці, удзелу ў жыцці класа, вучэбнай групы. Павінны праводзіцца і інфармацыйныя гадзіны, адзіныя ўрокі, прысвечаныя памятным падзеям, дзяржаўным святам і знамянальным датам.
Класны кіраўнік, куратар вучэбнай групы праводзяць работу па прафілактыцы супрацьпраўных паводзін, фарміраванні прававой культуры навучэнцаў, рэалізацыі прынцыпу інклюзіі ў адукацыі, удзельнічаюць у рэалізацыі плана мерапрыемстваў па ўстараненню прычын і ўмоў, якія прывялі да стварэння неспрыяльнай для дзяцей абстаноўкі, плана абароны правоў і законных інтарэсаў дзіцяці, правядзенні індывідуальнай прафілактычнай работы. Акрамя таго, яны рыхтуюць навучэнцаў да самастойнага жыцця, прафесійнага самавызначэння, выбару прафесіі і працы, садзейнічаюць выхаванню культуры побыту і вольнага часу і інш.
Крыніца: valozhin.by
