Шматлікімі сцягамі, дзіцячымі забавамі, усмешкамі на тварах дарослых і, вядома ж, выдатнымі песнямі артыстаў краіны запомніўся фэст у аграгарадку Ракаў. На Валожынскай зямлі, якая дала пачатак абласной маладзёжнай акцыі, і завяршылася кола канцэртных тураў, прысвечаных Году малой радзімы.
Перад пачаткам акцыі на плошчы Свабоды аграгарадка і бліжэйшых вуліцах разгарнуліся атракцыёны, гульнявыя пляцоўкі, выязныя гандлёвыя кропкі.
А фестываль пачаўся яркім флэшмобам, у якім паўдзельнічала самая актыўная моладзь Валожыншчыны.
Ракаўскім ваколіцам дасталося многае: і выдатная прырода, і старажытныя гарадзішчы, і багатая спадчына продкаў. Аднак найперш гэта зямля славіцца працавітымі людзьмі, якія шчыра любяць сваю малую радзіму, нястомна ўмацоўваюць фундамент жыцця і, вядома ж, з радасцю сустракаюць гасцей. Гэта ў поўнай меры адчулі салісты арт-гурта «Беларусы», якія першымі адрасавалі вядомыя песні нашым слаўным землякам.
Артыст беларускай эстрады Аляксей Хлястоў таксама сабраў хвалю апладысментаў. Прысутныя, добра знаёмыя з тэкстамі яго твораў, актыўна дапамагалі спеваку.
Святочную праграму працягнулі ўдзельнікі арт-гурта «Багач».
Кацярына Лазука падарыла ракаўчанам і гасцям мерапрыемства сучасныя хіты, папулярныя ў маладзёжным асяроддзі. А вось гурт «СССР» нагадаў пра бессмяротны подзвіг продкаў, дзякуючы каму мы сёння жывём у незалежнай Беларусі. Іх песні, напоўненыя любоўю да Радзімы і блізкіх людзей, знайшлі гарачы водгук у сэрцах гледачоў.
Канцэртную праграму закрываў маладзёжны гурт «PROвокация».
Сяргей Садоўскі
Фота аўтара
Источник: https://www.mlyn.by/
