Аўтар не проста творча самаўвасабляецца і замілоўваецца прыроднымі вобразамі, яе меседж глабальны: ахова экалогіі, беражлівае стаўленне да навакольнага асяроддзя. Наталля Бардзілоўская пазнаёмілася з аўтарам.
Яркія эмоцыі выклікае ў мастацтвазнаўцаў, гледачоў новая выстава Барысаўскай бібліятэкі. Гледзячы на гэты жывапіс - вывераны, каларыстычна правільны, наведвальнікі экспазіцыі не вераць, што маляваў не майстар, а аматар, не прафесіянал, а чалавек, які выпадкова ўзяў у рукі палітру з пэнздлем. Наталля Антонава ўсё жыццё прысвяціла спецыяльнасці "IT-аналітык", але 11 гадоў таму разам з мужам памяняла шумную сталіцу на невялікі гарадок Жодзіна, паралельна змяніла працу камп’ютаршчыка на вольны арт. Жыве ў прыватным доме, на прыродзе, яе мастацкі погляд не прапускае ніводную пару года з яе непаўторнымі з'явамі. Стварае работы, у якіх не проста замілаванне, а заклік берагчы наваколле і любіць гэты свет.
Простыя сюжэты, немудрагелістыя вобразы. На рахунку самадзейнага аўтара не адна выстава і адзнака Еўразійскага мастацкага таварыства, якое дае магчымасць творцам з розных краін мець стасункі, абменьвацца вопытам, ладзіць агульныя выставы. Недыпламаваны жывапісец, Наталля Антонава заваёўвае сімпатыі прафесійных мастацтвазнаўцаў сваёй непасрэднасцю, свежым поглядам на прадметы сваіх выяў і на мастацтва ўвогуле.
Сёння на мальберце Наталлі Антонавай графіка. Жывапісец, якая выдатна адчувае колер, вырашыла паспрабаваць сябе ў найскладаным відзе выяўленчага мастацтва. Хай і ў чорна-белых фарбах, але аўтар малюе прыроду і па-ранейшаму падкрэслівае яе цесную ўзаемасувязь з чалавекам.
"Побач" - назва выставы Наталлі Антонавай. У адным слове ўвасоблена ўся філасофія мастацкага праекта, які заклікае людзей да эстэтыкі прастаты, умення радавацца штодзённым рэчам і знаходзіць прыгажосць у звычайным.
Крыніца: minsk-region.gov.by
