Кіраўніком дзяржавы ўзята на кантроль сітуацыя перавозак пасажыраў са станцыі метро "Уручча" ў Мінску ў напрамку Жодзіна і Барысава. Прынята рашэнне аб набыцці для Мінскага аблвыканкама дадаткова 15 міжгародніх аўтобусаў. "Гэта дасць магчымасць скараціць частату руху транспарту, мы зменшым інтэрвал. І другое рашэнне, якое прынята Мінтрансам, - прадаваць білеты па гэтых напрамках будуць непасрэдна на прыпыначным пункце і з дапамогай інтэрнэту для таго, каб чалавек заходзіў у аўтобус адразу з білетам і мог спакойна садзіцца на сваё месца і ехаць, а не стаяць у чарзе за білетам", - сказаў Аляксей Ляхновіч.
Паводле яго слоў, стаіць задача закупіць аўтобусы ў бліжэйшы тыдзень. У такі ж тэрмін плануюць арганізаваць продаж білетаў па новай схеме.
Аўтобусаў закупяць 15 - як жа іх размяркуюць паміж напрамкамі? "Мінская вобласць будзе вырашаць, колькі аўтобусаў у тым ці іншым напрамку - Жодзіна ці Барысаў - неабходна дадаць. Магчыма, калі мы будзем бачыць, што чэргі зніклі, што аўтобусы не запаўняюцца, гэтыя аўтобусы пойдуць на іншыя напрамкі - у той жа Фаніпаль або па іншых маршрутах, дзе загрузка будзе большай. Гарады-спадарожнікі таксама на асаблівым кантролі", - адказаў міністр. Паралельна з аўтобусамі прадоўжаць рух і маршруткі.
"Што датычыцца гарадоў-спадарожнікаў, то задача на наступную пяцігодку - зрабіць так, каб да ўскраіны Мінска можна было даехаць за 20-25 хвілін. Зрабіць жыццё ў гарадах-спадарожніках камфортным. Калі гаварыць пра трасы і пад'язныя шляхі, прынята рашэнне на ўзроўні кіраўніка дзяржавы - асноўныя выезды з Мінска будзем рабіць у бетонным выкананні. Вось цяпер мы робім у бок Рудзенска - гэта аўтамабільная дарога М4 Мінск - Магілёў. Там участак даволі вялікі. Мы пашыраем і робім бетонкай. Выпрабавалі такую тэхналогію, як кладка бетону на асфальт. У наступным годзе мы пойдзем у бок Заслаўя. Таксама будзем рабіць капітальны рамонт аўтамабільнай дарогі", - падзяліўся планамі міністр.
Крыніца: minsk-region.gov.by
