"Толькі за люты-сакавік 2026 года ў Мінскай вобласці маніторынгамі ахоплена больш як 40 арганізацый па пытаннях падрыхтоўкі да правядзення веснавых палявых работ", - адзначыў Андрэй Мацяюк.
У кожнай трэцяй арганізацыі Мінскай вобласці па выніках праверак КДК устаноўлены асобныя парушэнні і недахопы. "Сярод тыповых - працяглыя рамонты тэхнікі, незахаванне графікаў рамонту, нізкая забяспечанасць угнаеннямі і пасяўным матэрыялам. Па ўсіх гэтых фактах аператыўна інфармаваліся мясцовыя органы ўлады, кіраўнікам арганізацый выдаваліся рэкамендацыі", - сказаў ён.
Улічваючы, якая стаіць задача перад аграрыямі рэспублікі, - атрымаць ураджай не ніжэйшы за ўзровень мінулага года, а яшчэ лепш прырасці да гэтага паказчыка, - дробязей не бывае, падкрэсліў Андрэй Мацяюк. "Вельмі шмат залежыць ад кіраўніка на месцах, ад таго, як будзе арганізавана работа, як будуць выконвацца тэхналагічныя рэгламенты пры правядзенні пасяўной кампаніі. Тым больш частка нашых заўваг, якія мы бачым на месцах, не патрабуе каласальных фінансавых сродкаў для ўстаранення. Іх можна выправіць за пару гадзін", - расказаў ён.
Напрыклад, пры наведванні адной з арганізацый Мінскай вобласці было ўстаноўлена, што пад адкрытым небам знаходзілася каля 200 т мінеральных угнаенняў. Аказалася, што ў гаспадаркі ёсць пусты склад, куды гэтыя ўгнаенні можна было перавезці. "Нягледзячы на тое, што пад уздзеяннем атмасферных ападкаў угнаенні пачалі злежвацца, да наведвання кантралёраў меры не былі прыняты. Пасля нашага ўмяшання на працягу некалькіх гадзін усё было ўстаранёна", - прывёў прыклад начальнік упраўлення.
Кантрольныя мерапрыемствы праводзяцца круглы год. "Як толькі завяршылася ўборачная кампанія, адразу стаіць на парадку дня пытанне падрыхтоўкі тэхнікі. Гэта значыць, завяршылі ўборку - склалі дэфектавальныя ведамасці, адрамантавалі тэхніку і паставілі на захоўванне. Ужо, груба кажучы, з канца восені мы праводзім свае мерапрыемствы па гэтым пытанні", - сказаў Андрэй Мацяюк.
Паводле яго слоў, задача, якую ставіў урад перад Мінскім аблвыканкамам (па гатоўнасці тэхнікі не менш як 95 працэнтаў), у вобласці ў цэлым выканана. "Разам з тым на 25 сакавіка яшчэ не было адрамантавана каля 60 энерганасычаных трактароў. Таксама нашы кантрольныя мерапрыемствы паказваюць, што ёсць недахопы ў частцы работы райаграсэрвісаў", - расказаў начальнік упраўлення.
Цяпер у рамках даручэння прэзідэнта Мінскім аблвыканкамам праводзіцца работа па аднаўленні аграсэрвісаў у Барысаўскім, Пухавіцкім, Вілейскім і Мядзельскім раёнах. "На дзеючых райаграсэрвісах мы фіксуем сітуацыю, калі не ўсё існуючае абсталяванне задзейнічана. Напрыклад, у адной з арганізацый з 27 адзінак абсталявання не выкарыстоўваецца частка з-за адсутнасці спецыялістаў", - абазначыў праблему ён.
Таксама ёсць пытанне па абнаўленні матэрыяльна-тэхнічнай базы райаграсэрвісаў. Частка абсталявання ўжо фізічна і маральна ўстарэла, патрабуе замены для правядзення больш працаёмкіх аперацый.
Крыніца: minsk-region.gov.by
