Датацыйныя сродкі на ўтрыманне дзяцей у лагерах з дзённым знаходжаннем склалі 4 беларускіх рубля 20 капеек на адзін койка-дзень на аднаго дзіцяці. Даплата для дзяцей ва ўзросце 11-13 гадоў склала 2 рублі 76 капеек, ва ўзросце 14-17 - 4 рублі 80 капеек.
Пры камплектаванні аздараўленчых лагераў было прадугледжана першачарговае аздараўленне дзяцей са шматдзетных і малазабяспечаных сем'яў, навучэнцаў, якія стаяць на розных відах уліку. За гэты час аздаравіліся 6 дзяцей з малазабяспечаных сем'яў, 80 - са шматдзетных, 4 дзяцей-сірот, 21 дзіця, якое знаходзіцца ў сацыяльна небяспечным становішчы, 5 навучэнцаў, з якімі праводзіцца індывідуальная прафілактычная праца.
Праца кожнага аздараўленчага лагера была арганізавана на аснове легенды, якая суправаджала навучэнцаў на працягу аздараўлення. У планы былі ўключаны мерапрыемствы, накіраваныя на прафілактыку дзіцячага дарожна-транспартнага траўматызму, супрацьпраўных дзеянняў, пажарнай бяспекі, інфекцыйных захворванняў.
На час аздараўленчых лагераў 210 актыўных хлопчыкаў і дзяўчынак разам са сваімі не менш актыўнымі выхавацелямі на 6 дзён сталі жыхарамі казачнай краіны. Хлопцы падарожнічалі разам з казачнымі героямі ў чароўныя краіны, дзе іх чакалі прыгоды, яркія і цікавыя конкурсы, незвычайныя сюрпрызы: ім трэба было паспець вярнуць скрадзеныя старонкі «Чароўнай кнігі» да наступлення Новага года, інакш запаветныя жаданні не змогуць споўніцца; разам з разумным бабром, неспакойнай птушачкай, дапытлівым зайцам і няўрымслівым ваўком у займальнай форме вывучалі правілы бяспечных паводзін; удзельнічалі ў конкурсных праграмах і віктарынах, пабывалі ў гасцях у Бабы-Ягі, Кашчэя Несмяротнага, вадзянога для таго, каб знайсці і вярнуць чароўны посах Дзеду Марозу, у калектыўных творчых справах «А наша ялінка самая прыгожая», «Самы лепшы снегавік». Ва ўсіх аздараўленчых лагерах працавалі майстэрні Дзеда Мароза.
Мерапрыемствы былі накіраваны на экалагічнае выхаванне і здаровы лад жыцця. Для хлопцаў праводзіліся хвілінкі бяспекі «Асцярожна: тонкі лёд!», «З агнём не жартуюць», хвілінка здароўя «Чараўніцтва Зубной феі».
Аздараўленчая дзейнасць садзейнічала фарміраванню ў навучэнцаў культуры фізічнага здароўя, цікавасці да спорту. Фізічныя нагрузкі, свежае паветра, наведванне прыгожых і ўтульных куткоў прыроды, правядзенне спартыўна-аздараўленчых, інтэлектуальных і забаўляльных мерапрыемстваў спрыялі стварэнню станоўчага фізіялагічнага, псіхалагічнага і эмацыйнага фону. Рухомыя гульні на свежым паветры дазволілі кожнаму дзіцяці праявіць свае творчыя здольнасці і фантазію.
Падчас аздараўлення усе хлопцы атрымалі масу пазітыўных эмоцый, радасны і вясёлы настрой.
Ва ўсіх аздараўленчых лагерах былі прыняты меры па забеспячэнні няўхільнага выканання правілаў бяспечных паводзін навучэнцаў і стварэнню бяспечных умоў у месцах адпачынку і аздараўлення.
У лагерах выконваліся санітарна-супрацьэпідэмічныя мерапрыемствы: зацверджаны графікі ветрання і вільготнай уборкі, планы мерапрыемстваў па папярэджанні заносу і распаўсюджвання інфекцыі COVID -19.
