Выязны семінар Нацыянальнага агенцтва па турызме па Мінскай вобласці прайшоў у незвычайным фармаце экскурсійнай паездкі. Карэспандэнт «Прысталічча» пабываў на маршруце і даведаўся, што аповед пра родную вобласць можа быць яркім і харызматычным.
Кантрабандысты, за мной ша-а-а-гам марш!
Пасля збору каля Міністэрства спорту і турызму ўсе ўдзельнікі семінара, сярод якіх былі прадстаўнікі Нацыянальнага агенцтва па турызме, а таксама кіраўнікі турыстычных фірмаў, адправіліся ў бок Заслаўя. Адзін з гарадоў-спадарожнікаў Мінска знаёмы ледзь не большасці ўдзельнікаў паездкі. Але, аказалася, знайсці цікавае можна нават у тым, што ўжо здаецца даўно вядомым.
І адразу нечаканасць! Кандыдат гістарычных навук Ігар Мельнікаў, апрануты ў форму старэйшага палітрука ўзору зімы 1935 года. І вось з гэтага моманту пачалося! Аўтар кнігі «Заходнебеларуская Атлантыда 1921-1941 гг.» правёў яркую, пазнавальную і эмацыйную экскурсію, распавёўшы прысутным пра асаблівасці жыцця памежнай тэрыторыі Рэчы Паспалітай і БСССР у 1930-1940-я гады мінулага стагоддзя.
Уручыўшы для пачатку кожнаму з прысутных савецкія, польскія і брытанскія «пашпарты» той эпохі, Ігар Вячаслававіч пачаў сваё апавяданне пра няпростае прымежнае жыццё жыхароў Заслаўя, аб праходзіўшай непадалёк «лініі Керзона», згодна з якой гэтая частка Беларусі была падзелена паміж савецкім урадам і Польшчай паводле Рыжскай мірнай дамовы 1921 года. Пераходзячыя мяжу каровы, маглі давесці свайго пастуха да засценкаў НКВД, маладая арыстакратка з роду Любецкіх-Друцкіх, воляй лёсу апынуўшаяся на Савецкай зямлі, уцёкшая з турмы і забітая дагнаўшымi яе чырвонаармейцамі роўна 100 гадоў таму - падобнага роду гісторыі не пакінулі абыякавымі нікога.
Этнаграфічны комплекс «Млын» гісторыка-культурнага музея-запаведніка «Заслаўе» паказаў гасцям адноўленую «Батлейку». Удзельнікі таксама наведалі музей-ДАК - першы на тэрыторыі постсавецкай прасторы музей фартыфікацыі часоў Другой сусветнай вайны, які быў адкрыты ў 2004 г. у агнявой кропцы №115 Мінскага ўмацаванага раёна.
Салаўіныя пошчакі і кантрабандная сталіца Ракаў
Наступным пунктам была вёска Новае Поле, дзе групе экскурсантаў паказалі сядзібу Друцкіх-Любецкіх, збудаваную ў сярэдзіне XIX стагоддзя. У горадзе Ракаў зноў успомнілі тэму кантрабандыстаў, а таксама ўбачылі Спаса-Праабражэнскую царкву (1793 г.).
Таксама была праведзена аглядная экскурсія па г.Івянец з наведваннем дзяржаўнай установы «Івянецкі музей традыцыйнай культуры», на базе якога арганізаваны майстры-класы па народных рамёствах. Удзельнікаў парадавала прэзентацыя-канцэрт гульні на аўтэнтычных беларускіх музычных інструментах у выкананні Кацярыны Радзівілавай, былой удзельніцы гурта «Стары Ольса».
Аўтар артыкула: Дзмітрый Анацко
Аўтар фота: Святлана Курэйчык
