У гэтыя дні супрацоўнікі Дзяржаўтаінспекцыі, выкарыстоўваючы негалосны і змешаны кантроль, будуць выяўляць і спыняць парушэнні Правілаў дарожнага руху вадзіцелямі. Асабліва калі кіроўца не прадаставіў перавагі пешаходам, перавозіў пасажыраў з парушэннямі ПДР (у першую чаргу дзяцей), парушыў правілы абгону і не захоўваў хуткасныя рэжымы.
Таксама ўпор зробяць на грубыя парушэнні ПДР - кіраванне транспартам у стане ап'янення і кіраванне, не маючы на гэта правоў. Не застануцца без увагі і пешаходы-парушальнікі ПДР.
Дзяржаўтаінспекцыя рэкамендуе кіроўцам пры руху ўлічваць дарожныя ўмовы, выконваць хуткасныя рэжымы і правілы абгону. У абавязковым парадку прышпільвацца рамянямі бяспекі, а малалетніх дзяцей перавозіць у спецыяльных дзіцячых утрымліваючых прыладах.
Пешаходам жа не варта забываць абазначаць сябе ў цёмны час сутак святлоадбіўнымі элементамі. Пешы ўдзельнік дарожнага руху або веласіпедыст, на верхняй вопратцы якога замацаваны такі элемент, прыкметны пры блізкім святле фар аўтамабіля за 150 м, а пры далёкім - за 400 м. Без флікера бачнасць скарачаецца ў некалькі разоў, асабліва калі чалавек апрануты ў цёмную вопратку. Аднак быць вельмі засяроджанымі пры праездзе слаба асветленых участкаў дарогі варта і кіроўцам.
Аўтар фота: Крысціна Чабан
