Як распавяла начальнік упраўлення адукацыі, спорту і турызму Валожынскага райвыканкама Таццяна Крыкала, у тэхнічным парку кіравання 4 «ГАЗэлі» старэйшыя за 10 гадоў. Таму абнаўленне аўтобусаў стаяла ў планах да новага 2022-2023 навучальнага года.
- Прыемная навіна прыйшла напярэдадні навагодніх святаў — адзначыла Таццяна Мікалаеўна. - З раённага бюджэту былі вылучаны сродкі для набыцця двух новых аўтобусаў для падвозу навучэнцаў устаноў адукацыі раёна. Адзін з іх накіруем у сярэднюю школу № 1 г. Валожына - «стары» перададзім фізкультурна-аздараўленчаму цэнтру для экскурсійнай дзейнасці і развіцця турызму. Другі аўтобус будзе задзейнічаны для падвозу школьнікаў на вёсцы.
Новыя школьныя аўтобусы адпавядаюць шырокаму пераліку патрабаванняў, аснашчаны шырокім спектрам абсталявання і опцый. У прыватнасці, прадугледжаны абаграванне салона, устаноўлена абмежаванне хуткасці не больш за 60 кіламетраў за гадзіну, усе дзіцячыя сядзенні абсталяваны рамянямі бяспекі. У адным аўтобусе размяшчаецца 18 пасадачных месцаў.
Варта адзначыць, што ўсяго з абласнога і раённага бюджэтаў на развіццё і падтрымку адукацыйнай сістэмы Валожынскага раёна толькі ў снежні 2021 года вылучаны 620 тысяч рублёў. За гэтыя сродкі набыты школьная мэбля, спартыўны інвентар, тэхналагічнае абсталяванне для харчаблокаў, інтэрактыўныя дошкі, камп'ютарны клас у Вішнеўскую школу.
