Сёння ў Валожынскім сельскагаспадарчым прафесійным ліцэі адбылося ўрачыстае ўзнагароджанне пераможцаў трэцяга этапу рэспубліканскай алімпіяды па матэматыцы. 45 удзельнікаў з 94 адзначаны дыпломамі.
Дыплом 3-й ступені з рук дырэктара ліцэя Святланы Мучынскай атрымала ўдзельніца ад Валожынскага раёна, гімназістка Соф'я Курбацкая.
Такія ж дыпломы атрымалі яшчэ 23 удзельнікі.
Дыпломамі 2-й ступені 13 дзяцей узнагародзіла начальнік упраўлення па спорце і турызме райвыканкама Таццяна Крыкала.
Дыпломы 1-й ступені 8-і ўдзельнікам уручыў старшыня журы, загадчык кафедры геаметрыі, тапаграфіі і методыкі выкладання матэматыкі механіка-матэматычнага факультэта БДУ Дзмітрый Базылеў.
У адрас удзельнікаў гучалі словы прывітання, віншаванні і падзякі за імкненне праслаўляць свае навучальныя ўстановы, раёны, вобласць і краіну ў цэлым. Завяршылася свята канцэртнай праграмай.
Валянціна КРАЎНЕВІЧ
