У рамках другога этапу рэспубліканскай акцыі «Бяспека ў кожны дом!» ратавальнікі правялі мерапрыемства з навучэнцамі Валожынскага сельскагаспадарчага прафесійнага ліцэя. Хлопцы апынуліся ў ролі дэтэктываў, якім трэба было высветліць прычыны адбыўшыхся пажараў і знайсці вінаватых.
З першым заданнем па вызначэнні гукаў удзельнікі акцыі справіліся выдатна. А вось з вызначэннем прычын, па якіх мог адбыцца пажар, узніклі невялікія складанасці. Некаторыя сітуацыі, якія былі намаляваны на малюнках, хлопцам і зусім не здаліся небяспечнымі. Але пасля тлумачэння інспектара, усе пагадзіліся, што нават, здавалася б, не значнае парушэнне можа прывесці да пажару.
- Для мяне гэта заданне аказалася найбольш цікавым, але ў той жа час і вельмі складаным, - пракаментаваў адзін з удзельнікаў акцыі. - Не так проста без спецыяльнай падрыхтоўкі вызначыць з-за чаго адбыўся пажар. Але цяпер я ўсё ведаю. Але спадзяюся, што ніколі з гэтым не прыйдзецца сутыкнуцца, так як гэта вельмі страшна, за гэтым заўсёды стаiць чалавечы боль і страты.
Заданні па вызначэнні віноўнiкаў пажару, а таксама іх слядоў трохі павесялілі хлопцаў, але ў той жа час мелі і павучальны характар.
І хоць мерапрыемства мела спаборніцкі характар, пераможцам тут быў кожны. Бо веды, якія навучэнцы атрымалі ад ратавальнікаў, дапамогуць ім справіцца з любой надзвычайнай сітуацыяй.
