Году гістарычнай памяці прысвяцілі спартыўна-патрыятычнае мерапрыемства супрацоўнікі тэрытарыяльнага цэнтра сацыяльнага абслугоўвання і выхаванцы аддзялення для інвалідаў. У велапрабегу, які прайшоў пад дэвізам «Ведаем, захоўваем, памятаем», яны запрасілі паўдзельнічаць прадстаўнікоў такіх жа аддзяленняў з Дзяржынска і Стоўбцаў.
Пачаткам мерапрыемства стала сустрэча ў аддзяленні для інвалідаў у Валожыне на вуліцы Набярэжнай. Далей на аўтатранспарце ўдзельнікі дабраліся да пасёлка Першамайскага, дзе наведалі помнік, узведзены ў гонар партызан і падпольшчыкаў. Супрацоўнік краязнаўчага музея Ніна Бобрык распавяла прысутным пра гісторыю партызанскага руху ў Налібоцкай пушчы. Тут адбыўся старт інклюзіўнага веламарафона, удзельнікі якога накіраваліся ў вёску Яцкова, дзе ўсклалі кветкі да брацкай магілы, у якой пахавана 340 партызан.
Фінальным пунктам марафону стала экалагічная iнклюзіўная сцежка на беразе ракі Іслач, дзе прайшло ўзнагароджанне ўдзельнікаў і валанцёраў. Падарункі, набытыя на сродкі спонсараў, і памятныя дыпломы ўручалі дырэктар ТЦСАН Галіна Рай і загадчыца аддзялення для інвалідаў Таццяна Акушко.
Для ўдзельнікаў сіламі супрацоўнікаў ТЦСАН былі наладжаны пікнік і дыскатэка.
Валянціна КРАЎНЕВІЧ
