На Валожыншчыне працягваецца парад свят вёсак. 9 ліпеня адсвяткавала сваё свята вёска Лінкі Вішнеўскага сельскага савета, а 10 жніўня святочную эстафету падхапілі жыхары вёскі Пугачы Ракаўскага сельскага савета.
Адкрыў урачыстасць старшыня Ракаўскага сельвыканкама А. А. Мякінка. Ён падкрэсліў, што галоўнае багацце вёскі - яе жыхары, чыя праца ляжыць у аснове дасягненняў сённяшняга дня.
На свята былі запрошаны вядомы пісьменнік, паэт, лаўрэат шматлікіх нацыянальных прэмій і ўзнагарод, намеснік галоўнага рэдактара выдавецтва «Мастацкая літаратура», член Саюза пісьменнікаў Беларусі Віктар Шніп са сваёй жонкай, вядомай беларускай паэткай Людмілай Рублеўскай; былы старшыня калгаса «Бальшавік» С. А. Лужынскі. У ролі спонсара выступіў дырэктар філіяла «Валожынскі» ААТ Агракамбінат «Дзяржынскі» Д. С. Каралёнак.
Па традыцыі музычнымі віншаваннямі і падарункамі ўшаноўвалі ў той дзень самага маленькага і доўгажыхароў вёскі, сямейных юбіляраў, перадавікоў, гаспадароў лепшага прысядзібнага ўчастка. Святочная праграма на гэтым не завяршылася, бо салісты Дорскага сельскага Дома культуры і Валожынскага раённага цэнтра культуры працягвалі дарыць вяскоўцам выдатныя песні. Гледачы з удзячнасцю прымалі цёплыя словы пажадання здароўя, шчасця і дабрабыту, а кожны выступ сустракалі гучнымі апладысментамі.
