«У цэнтры ўвагі дзеці!» - менавіта пад такой назвай праходзіць рэспубліканская прафілактычная акцыя па ўсёй краіне. А праводзіцца яна з мэтай прыцягнення ўвагі грамадскасці да праблемы траўматызму і гібелі дзяцей ад пажараў з прычыны пакідання іх без нагляду.
У Валожынскім раёне першы этап акцыі прайшоў у ГЦ «Квартал». Гэты гандлёвы аб'ект быў абраны не выпадкова. Менавіта сюды, у апошнія летнія дні, бацькі разам са сваімі дзецьмі ідуць, каб выбраць прыгожы ўбор у школу і дакупіць неабходныя канцылярскія тавары.
Работнікі Валожынскага раённага аддзела па надзвычайных сітуацыях абсталявалі ў краме «астравок бяспекі», дзе навучалі наведвальнікаў правілам бяспекі. Работнікі аддзела па надзвычайных сітуацыях праводзілі працу як з дзецьмі, так і з іх бацькамі. Бо зберагчы дзяцей ад неабдуманых учынкаў і навучыць правілам бяспекі - задача дарослых.
Навучальныя гульні і цікавыя заданні прыцягвалі ўвагу ўсіх наведвальнікаў без выключэння. А падарунак ад ратавальнікаў быў прыемным дадаткам да атрыманых ведаў.
