З 1 жніўня па 15 верасня па ўсёй рэспубліцы праходзіць маштабная дабрачынная кампанія Беларускага Таварыства Чырвонага Крыжа «Збярэм дзяцей у школу»
Вось ужо не за гарамі пачатак новага навучальнага года. Хутка загарэўшыя і напоўненыя летнімі ўражаннямі дзеці вернуцца за парты. Напярэдадні 1 верасня ў рамках рэспубліканскай дабрачыннай акцыі Валожынская раённая арганізацыя Беларускага таварыства Чырвонага Крыжа ўжо праводзіць мерапрыемствы па зборы канцылярскіх тавараў і школьных прылад, адзення і абутку.
Акцыя арганізоўваецца для дзяцей з малазабяспечаных сем'яў, дзяцей-інвалідаў і знаходзячыхся ў сацыяльна небяспечным становішчы, а таксама сем'яў бежанцаў.
Падчас правядзення акцыі па зборы сродкаў на рынку сабрана 51 адзінка новага адзення, 65 пар новага абутку, 26 адзінак канцылярскіх тавараў.
Старшыня раённай арганізацыі БТЧК Антаніна Трацеўская выказвае падзяку за актыўны ўдзел індывідуальным прадпрымальнікам: Данько Зоі Паўлаўне, Зянько Тамары Іванаўне, Шамагонавай Раісе Фёдараўне, Мікуліч Наталлі Вітальеўне, Скубіеву Сяргею Валер'евічу, Скляповіч Людміле Фёдараўне, Шульжыцкай Святлане Віктараўне, Пісарык Юліі Мікалаеўне, Пракапенка Але Мікалаеўне, Колышкавай Але Мікалаеўне, Горбач Тамары Уладзіміраўне, Сяржанту Ігару Валянцінавічу. А таксама словы падзякі ўсім жыхарам, хто ўнёс свой пасільны ўклад у такую добрую справу.
Акцыя працягваецца і кожны з вас, паважаныя жыхары горада і раёна можа ўнесці свой уклад. Агарніце клопатам і, у нейкім сэнсе, чараўніцтвам не толькі сваё дзіця, бо добрых сюрпрызаў і цудаў чакаюць усе дзеці.
Крыніца: valozhin.by
