На чарговай пяцьдзесят першай сесіі Валожынскага раённага Савета дэпутатаў дваццаць восьмага склікання пад старшынствам Пятра Бібіка было разгледжана сем пытанняў.
Асноўнымі пытаннямі для абмеркавання сталі праца суб'ектаў прафілактыкі па папярэджанні пажараў і гібелі людзей ад іх, рэалізацыя мерапрыемстваў Дэкрэта Прэзідэнта Рэспублікі Беларусь ад 02.04.2015 №3 «Аб садзейнічанні занятасці насельніцтва». Удзел у мерапрыемстве прынялі старшыня райвыканкама Яўген Круковіч, члены Маладзёжнага парламента пры раённым Савеце дэпутатаў.
Аб рабоце па прафілактыцы пажараў і гібелі людзей ад іх на тэрыторыі раёна расказаў начальнік Валожынскага РАНС Аляксандр Сівы. Ён адзначыў, што адной з галоўных прычын пажараў па-ранейшаму з'яўляецца неасцярожнае абыходжанне з агнём, парушэнне правілаў мантажу і эксплуатацыі печаў, электраабсталявання. Найбольшая колькасць пажараў - 37 адбылася ў жылым фондзе. З пачатку года на дачах зарэгістравана 12 пажараў з іх 5 у садовых таварыствах. На тэрыторыі раёна зарэгістравана 85 садовых таварыстваў, размешчаных на тэрыторыі Ракаўскага, Першайскага, Валожынскага сельскіх саветаў. Назіральнымі камісіямі пры сельвыканкамах за 10 месяцаў бягучага года абследавана 15779 домаўладанняў і кватэр.
Аб працы назіральных камісіі распавялі старшыні Вішнеўскага сельскага савета Марына Траццяк і Ракаўскага сельскага савета Аляксандр Мякінка.
Аб рэалізацыі Дэкрэта Прэзідэнта Рэспублікі Беларусь ад 2 красавіка 2015 года №3 «Аб садзейнічанні занятасці насельніцтва» праінфармавала начальнік упраўлення па працы, занятасці і сацыяльнай абароне райвыканкама Святлана Ракавец. Яна адзначыла, што ў I квартале 2022 года ў базу даных грамадзян, не занятых у эканоміцы па Валожынскім раёне ўключана 2000 грамадзян. Найбольшая колькасць грамадзян, звесткі аб якіх змяшчаюцца ў базе даных, пражываюць у сельскай мясцовасці (1194 чалавекі). Мужчын амаль у 2 разы больш, чым жанчын (1283 і 717 чалавек адпаведна). Маладыя людзі ва ўзросце да 31 года склалі 24,4 працэнта ад агульнай базы даных (487 чалавек).
— Усе беспрацоўныя грамадзяне запрашаліся на пасяджэннi камісіі, былі азнаёмлены з наяўнымі вакансіямі. 46 былі накіраваны ў аддзел занятасці. З іх: 18 - працаўладкаваліся, 9 - накіраваны да наймальнікаў, 19 - ад садзейнічання ў працаўладкаванні адмовіліся, 17 -працаўладкаваліся самастойна.
Камісія сумесна з дэпутатамі індывідуальна вывучае жыццёвую сітуацыю кожнага, для чаго праводзяцца пры неабходнасці падворныя абходы, іншымі спосабамі ўстанаўліваецца месцазнаходжанне людзей, індывідуальна разглядаюцца варыянты ўцягвання грамадзян у працоўную дзейнасць. У выніку работы камісіі сумесна з сельвыканкамамі пацвердзілі занятасць 1033 чалавекі. Колькасць не занятых у эканоміцы грамадзян склала 967 чалавек.
Старшыня райсавета папрасіў Святлану Ракавец даць ацэнку эфектыўнасці рэалізацыі Дэкрэта №3 і вылучыць праблемныя моманты:
— Пэўны эфект у яго рэалізацыі дасягнуты — мы дайшлі да кожнага чалавека, які знаходзіцца ў базе даных не занятых у эканоміцы, і пачулі яго прычыны і пажаданні. З праблемных момантаў хачу вылучыць нізкі ўплыў Дэкрэта №3 на заматываванасць сельскіх грамадзян у занятасці ў адрозненне ад гарадскога насельніцтва. Бо калі грамадзянін, які пражывае ў вёсцы, не працаўладкаваны, то яго можна матываваць толькі на перспектыву. Напрыклад, у тым, што ў яго не будзе пенсіённых правоў і іншых сацыяльных гарантый. Кампенсаваць затраты гарачага водазабеспячэння, індывідуальнага і цэнтралізаванага ацяплення яму наўрад ці давядзецца, таму што ў асноўным гэтыя паслугі накіраваны на гарадскіх жыхароў, якія пражываюць у кватэрах.
Таксама падчас сесіі дэпутатамі былі зацверджаны праекты рашэнняў, з інфармацыямі па якіх выступілі начальнік фінансавага аддзела Святлана Церах, начальнік аддзела эканомікі Алена Садоўская і загадчык сектара жыллёва-камунальнай гаспадаркі райвыканкама Таццяна Занямонец. На сесіі дэпутаты ўнеслі шэраг змен у раней прынятыя рашэнні.
Крыніца: valozhin.by
