Міліцыянеры арганізавалі для навучэнцаў Суднікоўскай сярэдняй школы прафарыентацыйную экскурсію. Яна пачалася з наведвання музея РАУС.
Тут часова выконваючы абавязкі пасады намесніка начальніка па IРiКО маёр міліцыі Леанід Гіль расказаў вучням аб гісторыі мясцовай міліцыі, службовых буднях супрацоўнікаў, іх дасягненнях. У музеі сабраны дзясяткі экспанатаў. Гэта дакументы, фатаграфіі, узнагароды, газетныя публікацыі, узоры міліцэйскай формы розных эпох.
Падлеткі разгледзелі ўніформу вартавых парадку, сродкі сувязі, якімі карысталіся супрацоўнікі міліцыі розных гадоў. Цікавасць у хлопцаў выклікаў матацыкл «Урал» 1961 года выпуску. Са стэндаў на дзяцей глядзелі фатаграфіі тых, хто ў гады Вялікай Айчыннай вайны аддаў сваё жыццё за свабоду Радзімы, хто прайшоў Афганскую вайну.
Паказалі хлопцам умовы працы супрацоўнікаў, распавялі аб падраздзяленнях і службах міліцыі. Яркую цікавасць у рабят выклікалі ўзоры спецыяльных сродкаў і зброі. Хлопчыкі і дзяўчынкі змаглі не толькі ўбачыць, але і патрымаць у руках міліцэйскі рыштунак, з дапамогай якога раскрываюцца злачынствы, затрымліваюцца злачынцы, ажыццяўляецца ахова грамадскага парадку: шлем, аўтамат, пісталет, спецыяльны шчыт і многае іншае.
Магчымасць «апрабаваць» на сабе ці сябрах кайданкі, патрымаць у руках дубінку, праверыць, ці спрацуе металашукальнік, калі паднесці яго да невялікіх металічных прадметах, прымерыць на сябе бронекамізэльку – усё выклікала цікаўнасць. Пабывала група і ў ізалятары часовага ўтрымання.
Экскурсія скончылася прафілактычным выступленнем супрацоўнікаў міліцыі. Дзецям нагадалі правілы бяспечных паводзін у час канікул.
Наведванне РАУС пакінула шмат пазітыўных момантаў у школьнікаў. Яны даведаліся аб службах, якія маюцца ў райаддзеле, і аб тым, якія мерапрыемствы па прафілактыцы правапарушэнняў і злачынстваў супрацоўнікі міліцыі праводзяць.
