Аб праблемах экалогіі апошнім часам вельмі часта гавораць. Гэта нядзіўна - бо ад іх вырашэння залежыць жыццё будучых пакаленняў. 15 красавіка штогод адзначаецца Дзень экалагічных ведаў. У гэты дзень у Валожынскай дзіцячай бібліятэцы прайшло мерапрыемства, прысвечанае гэтай падзеі.
Бібліятэкар распавяла дзецям пра тое, што экалогія - гэта навука пра дом, і дом гэты вельмі вялікі: уся зямля з'яўляецца домам для істот, якiя на ёй жывуць. Дзеці абмеркавалі тэму беражлівых адносін да прыродных багаццяў і прыводзілі прыклады са свайго жыцця, як яны клапоцяцца пра навакольны свет.
У ходзе гутаркі школьнікі са здзіўленнем даведаліся, што ў прыродзе няма шкодных, непатрэбных раслін і жывёл, што ўсе яны цесна звязаны, па-свойму прыгожыя і карысныя.
Хлопцы паказалі сябе сапраўднымі знаўцамі прыроды: адгадвалі загадкі і адказвалі на пытанні. Усе ў падарунак атрымалі яркія налепкі з выявай жывёл.
Спадзяемся, што юным чытачам захочацца даведацца яшчэ больш пра жыццё птушак і звяроў, раслін і насякомых. І ў гэтым ім дапамогуць кнігі пра прыроду.
