У Валожыне адбылася рабочая сустрэча старшыні райвыканкама Віталя Бычкоўскага з кіраўніцтвам кампаніі ТДА "Экалогія горада". Удзел у дыялогу таксама прыняў дэпутат Палаты прадстаўнікоў Нацыянальнага сходу Рэспублікі Беларусь Іван Маркевіч.
Кампанія "Экалогія горада", якая працуе на рынку ўжо 20 гадоў, прапануе поўны комплекс паслуг у сферы абыходжання з адходамі – ад перапрацоўкі металалому да дэмантажу аб'ектаў. Кампанія строга прытрымліваецца экалагічных норм і стандартаў.
Сустрэча, як адзначылі яе ўдзельнікі, прайшла ў адкрытай і канструктыўнай атмасферы. Віталь Генадзьевіч выказаў зацікаўленасць раёна ў прыцягненні менавіта такіх адказных інвестараў, чыя дзейнасць прыносіць комплексную карысць: умацоўвае эканоміку, стварае новыя працоўныя месцы і спрыяе ўстойліваму развіццю тэрыторыі.
З боку кампаніі ў перамовах удзельнічалі заснавальнік Віталь Броўка, кіраўнік службы заказчыка Андрэй Русакоў і дарадца Андрэй Худык.
У ходзе дыялогу былі вызначаны патэнцыйныя напрамкі супрацоўніцтва. Кампанія гатова разгледзець рэалізацыю на тэрыторыі раёна інвестыцыйнага праекта па стварэнні сучасных вытворчых магутнасцяў для перапрацоўкі тэкстыльных і палімерных адходаў. Для гэтага інвестару неабходная прамысловая зона з участкам не менш аднаго гектара і магчымасцю тэхналагічнага далучэння да энергасетак. Наяўнасць гатовых капітальных будынкаў паскорыць старт праекта, аднак кампанія таксама разглядае варыянт будаўніцтва хуткаўзвадзiмых канструкцый. Важна, што прымяняемыя тэхналогіі з'яўляюцца бяспечнымі і не наносяць шкоду навакольнаму асяроддзю. Рэалізацыя гэтага праекта дасць магчымасць не толькі вырашыць важныя экалагічныя задачы па перапрацоўцы адходаў, але і стварыць новыя працоўныя месцы з годным узроўнем аплаты працы.
"Мы цалкам адкрытыя для дыялогу і сумеснай работы", – падкрэсліў старшыня райвыканкама Віталь Бычкоўскі.
"У сваю чаргу, мы бачым у Валожынскім раёне добры патэнцыял і надзейнага партнёра", – рэзюмаваў заснавальнік кампаніі "Экалогія горада" Віталь Броўка.
Гэтая сустрэча стала чарговым практычным крокам у рэалізацыі стратэгіі Валожынскага раёна, накіраванай на прыцягненне інвестыцый, стварэнне сучасных вытворчасцяў і павышэнне экалагічнай эфектыўнасці. Супрацоўніцтва з дасведчаным партнёрам адкрывае перад рэгіёнам новыя магчымасці для эканамічнага росту і паляпшэння якасці жыцця яго насельніцтва.
Вераніка Загорская, фота аўтара
