Адным з галоўных напрамкаў у рамках суботнікаў з'яўляецца навядзенне парадку на памятных месцах і воінскіх пахаваннях.
Рабочая група пад кіраўніцтвам старшыні райвыканкама Віталя Бычкоўскага правяла выязную нараду на тэрыторыі Івянецкага сельсавета. У склад групы таксама ўвайшлі начальнік аддзела ідэалагічнай работы і па справах моладзі Ірына Жданюк, а таксама прадстаўнікі лясгаса, ЖКГ.
Аб'ектам увагі стала магіла ахвяр фашызму, размешчаная непадалёк ад гарадскога пасёлка Івянец. Гэта месца стала апошнім прытулкам для тысячы мірных жыхароў, расстраляных у гады Вялікай Айчыннай вайны. У ходзе агляду тэрыторыі было прынята рашэнне аб правядзенні комплекснага добраўпарадкавання пахавання з захаваннем існуючай гістарычнай канцэпцыі.
У плане работ — комплекснае абнаўленне памятнага месца. Плануецца адрамантаваць пад'язную дарогу да пахавання, каб зрабіць яе больш зручнай для наведвання. Спецыялістам трэба будзе ачысціць прылеглую лесапаласу ад драўняна-хмызняковай параслі. Асаблівую ўвагу нададуць замене агароджы, якая на дадзены момант цалкам прыйшла ў непрыдатнасць і патрабуе абнаўлення. Завяршальным этапам стане добраўпарадкаванне і азеляненне тэрыторыі самога пахавання, дзе будуць высаджаны зялёныя насаджэнні і наведзены парадак.
Кіраўнік раёна даў адпаведныя даручэнні адказным службам і замацаваным за аб'ектам арганізацыям. Работы будуць выкананы ў бліжэйшы час.
Вераніка Загорская
