Сваё майстэрства на свяце дэманстравалі прадстаўнікі розных рэгіёнаў, асаблівую цікавасць наведвальнікаў выклікала экспазіцыя вало́жынскіх умельцаў. Яны прадставілі шырокі спектр рамёстваў — ад старажытнага ткацтва да сучаснай аўтарскай керамікі, паказаўшы пераемнасць пакаленняў і захаванне народных традыцый.
Сапраўднай «фартэцыяй» гурманаў і аматараў салодкага стаў конкурс «Пернікавы цуд». Каманды-ўдзельнікі падышлі да задання крэатыўна: кожны пернік быў не проста кулінарным вырабам, а своеасаблівай візітоўкай рэгіёна. Для афармлення і падачы сваіх шэдэўраў кандытары выкарыстоўвалі сімволіку родных гарадоў, мясцовыя традыцыі і архітэктурныя асаблівасці раёнаў.
Валожынскі гіганцкі пернік карыстаўся неверагодным попытам сярод гасцей. Чарга за ласункам не сціхала на працягу ўсяго фестывалю, а за апошні кавалак разгарнулася сапраўднае спаборніцтва — аўкцыён з частушкамі, які выклікаў шчырыя ўсмешкі і авацыі прысутных.
Фестываль «Нясвіжская фартэцыя» ў чарговы раз даказаў, што старадаўнія традыцыі жывуць і развіваюцца, аб’ядноўваючы творчых людзей і гасцей горада ў атмасферы радасці і добрых эмоцый.
