У Ракаве прайшла сустрэча прадстаўнікоў грамадскага аб'яднання "Беларускае таварыства экскурсаводаў і гідаў-перакладчыкаў" з кіраўніцтвам Валожынскага раёна. У цэнтры абмеркавання - развіццё турыстычнай інфраструктуры і стварэнне камфортных умоў для гасцей рэгіёна.
Сустрэча прайшла ў аграгарадку Ракаў, які лічыцца адной з турыстычных жамчужын Валожыншчыны. Удзельнікаў мерапрыемства вітала намеснік старшыні Валожынскага райвыканкама па эканоміцы Вольга Багатырова. Яна падрабязна спынілася на найбольш значных турыстычных аб'ектах раёна і расказала аб тым, як развіваецца сфера турызму ў бягучым годзе.
- Сёння Валожынскі раён прапануе гасцям разнастайныя маршруты. Ад знаёмства з унікальнымі помнікамі сакральнай архітэктуры да падарожжаў па маляўнічых экасцежках Налібоцкай пушчы. Асаблівая ўвага надаецца аўтэнтычнасці і захаванню народных традыцый, што прыцягвае ўсё больш турыстаў, якія стаміліся ад гарадской мітусні. Сёлета ў Валожыне адкрыўся сучасны турыстычны інфармацыйны цэнтр, які стаў адзінай каардынацыйнай пляцоўкай для гасцей рэгіёна, расказала Вольга Сяргееўна.
- У сваю чаргу экскурсаводы актыўна ўключыліся ў дыялог, задаўшы пытанні, якія тычацца турыстычнай інфраструктуры. Прафесіяналаў цікавіла транспартная даступнасць аб'ектаў і стварэнне дадатковых сэрвісаў для камфортнага знаходжання турыстаў.
Адкрыты дыялог паказаў, што і раённыя службы, і прафесійная супольнасць бачаць адзіную мэту - зрабіць Валожынскі раён яшчэ больш прывабным для ўнутранага і ўязнога турызму. Сустрэча ў Ракаве стала чарговым крокам у гэтым кірунку, пацвердзіўшы гатоўнасць бакоў да сумеснай работы над павышэннем турыстычнай прывабнасці рэгіёна.
Крыніца
