"У сельскагаспадарчых арганізацыях Беларусі за 11 месяцаў вырашчана 1,631 млн т жывёлы і птушкі ў жывой вазе (103,5 працэнта да студзеня - лістапада 2019-га) і атрымана 6,895 млн т малака (105,7 працэнта). Сярэдні надой малака ад каровы па краіне з пачатку года перасягнуў мінулагодні ўзровень на 252 кг і склаў 4,879 т. Дасягненне гэтых паказчыкаў забяспечана за кошт прынятых мер па рацыянальным расходаванні кармоў, арганізацыі вытворчасці прадукцыі ў адпаведнасці з тэхналагічнымі рэгламентамі. Мінсельгасхарч сумесна з навуковымі арганізацыямі краіны распрацаваў пратаколы тэхналагічных працэсаў, дзе пакрокава рэгламентуюцца ўсе аперацыі, якія павінен выконваць кожны работнік", - расказалі ў ведамстве.
Як адзначылі ў прэс-службе, у малочнай жывёлагадоўлі на працягу апошніх гадоў дасягнуты адны з самых высокіх паказчыкаў эфектыўнасці ў аграпрамысловым комплексе. Рэнтабельнасць продажаў малака за 9 месяцаў 2020-га склала 22,1 працэнта супраць 19,6 працэнта за адпаведны перыяд мінулага года, а рэалізацыя малака сорту экстра дасягнула амаль 60 працэнтаў супраць 51,5 працэнта ў 2019 годзе. У цэлым удзельная вага рэалізацыі малака ад агульнага яго аб'ёму вытворчасці з пачатку бягучага года склала 90,2 працэнта з прыростам 0,6 працэнтнага пункта.
Традыцыйна ў лідарах па прадукцыйнасці дойнага статка - раёны з высокім узроўнем тэхналагічнай дысцыпліны ў жывёлагадоўлі, падкрэслілі ў Мінсельгасхарчы. У 44 раёнах сярэдні надой малака ад каровы за 11 месяцаў бягучага года перасягнуў 5 т, а ў 7 раёнах надаілі больш за 7 т (Гродзенскі - 8,098 т, Нясвіжскі - 7,655 т, Смалявіцкі - 7,503 т, Дзяржынскі - 7,417 т, Брэсцкі - 7,409 т, Мазырскі - 7,16 т і Бераставіцкі - 7,145 т).
Лідзіруючую пазіцыю па прадукцыйнасці дойнага статка па-ранейшаму захоўвае СВК "Ларынаўка" Аршанскага раёна, дзе за 11 месяцаў на адну карову надоена 10,948 т малака. Крыху ўступае па надоі, але захоўвае дынаміку нарошчвання прадукцыйнасці дойнага статка УП "Моладава-Агра" Іванаўскага раёна Брэсцкай вобласці, дзе з пачатку года надой на карову склаў 10,862 т малака з прыбаўкай 911 кг. У СВК імя Дзеньшчыкова Гродзенскага раёна з пачатку года надой на карову склаў 10,762 т малака з прыбаўкай 745 кг. Сярод сельскагаспадарчых арганізацый Мінскай вобласці флагманам з'яўляецца філіял "Фалько-Агра" ААТ "Агракамбінат "Дзяржынскі" Дзяржынскага раёна, дзе на адну карову за 11 месяцаў надоена 10,149 т малака з прыбаўкай 553 кг.
"Для далейшага нарошчвання тэмпаў вытворчасці прадукцыі жывёлагадоўлі Мінсельгасхарч сумесна з аблвыканкамамі выпрацаваў стратэгічныя напрамкі развіцця на бліжэйшую і сярэднетэрміновую перспектыву. Першарадная роля адводзіцца прадаўжэнню работ па асваенні рэсурсазберагальных і навукаёмістых тэхналогій", - рэзюмавалі ў прэс-службе.
Крыніца: belta.by
