Валожынскі раённы
выканаўчы камітэт

Нагадваем, што ва ўсіх грамадскіх пунктах аховы правапарадку адзін раз у тыдзень (па серадах) участковыя інспектары міліцыі ажыццяўляюць прыём грамадзян. Усе жадаючыя могуць звярнуцца да праваахоўнікаў па пытаннях, якія адносяцца да кампетэнцыі органаў унутраных спраў.

Прыём грамадзян ажыццяўляецца па серадах: у сельскай мясцовасці - з 10 да 13 гадзін, у горадзе - з 17 да 20 гадзін.

Грамадскія пункты аховы правапарадку ў сельскай мясцовасці размешчаны ў будынках сельскіх выканаўчых камітэтаў па адрасе:

Валожынскі с/с - г. Валожын, пл. Свабоды, 21, Вішнеўскі с/с - аг. Вішнёвае, вул. Першамайская, 2, Івянецкi с/с - г.п. Івянец, пл. Свабоды, 2, Пяршайскі с/с - аг. Пяршаі, вул. К.Маркса, 20, Ракаўскі с/с - аг. Ракаў, пл. Свабоды, 11, Дорскі с/с - аг. Доры, вул. Савецкая, 5, Гарадзькоўскі с/с - аг. Гарадзькі, вул. Савецкая, 2а.

Грамадскі пункт аховы правапарадку г. Валожына знаходзіцца па адрасе: г. Валожын, вул. Партызанская, 6а.

Валожынскі РАУС

У Бабровіцкім культурна-спартыўным цэнтры працягнуўся цыкл мерапрыемстваў з дзецьмі і падлеткамі падчас восеньскіх канікул. 5 лістапада з хлопцамі быў праведзены майстар-клас па вырабе восеньскіх букетаў і тэкстыльных вырабаў. Праца творчай майстэрні перайшла ў танцавальна-гульнявую праграму «На вясёлай хвалі», дзе дзеці актыўна гулялі і прымалі ўдзел у розных конкурсах.

Да нядаўняга часу мір і не падазраваў, што можна святкаваць Дзень дабрыні.

13 лістапада — удалы час, каб узгадаць, як важна дарыць адзін аднаму яркія эмоцыі, тварыць дабро на ўсёй зямлі і несці ў гэты свет добрыя весткі.

 Кожны чалавек жадае, каб у яго жыцці былі добрыя, спагадлівыя сябры, саграваючыя сэрца словы і радуючыя душу ўчынкі. І менавіта гэтай выдатнай чалавечай якасці  быў прысвечаны ўрок дабрыні «Перадай дабро па крузе».

Прымаючы актыўны ўдзел у мерапрыемстве выхаванцы яслі-сад №3 «Пралеска» разважалі пра тое, што такое дабро, які чалавек добры, якія ўчынкі яго ўпрыгожваюць. Рабяты ўспаміналі літаратурныя творы, у якіх дабрыня, спагадлівасць і міласэрнасць дапамагаюць пераадольваць жыццёвыя перашкоды. З цікавасцю ўдзельнічалі ў гульні: «Казачны герой - добры і злы».

У дзіцячай бібліятэцы аформлена кніжная выстава «Ідзем дарогаю дабра». Кнігі, якія на ёй прадстаўлены, вучаць дабрыні, сяброўству, міласэрнасці, любові да чалавека і да ўсяго, што яго акружае.

Праводзячы гэта мерапрыемства, бібліятэкары ставілі за мэту стварыць атмасферу радасці, цяпла і дабрыні.

Далучайцеся і вы да гэтага добрага, цудоўнага свята. Бо гэта так проста – усміхніцеся мінаку, абдыміце бацькоў ці сябра, зрабіце камплімент калегу ці начальніку, падарыце кветкі суседцы ці незнаёмцы, патэлефануйце сябрам і скажыце ім якія яны выдатныя, змайструйце і павесьце на вуліцы кармушку для птушак, накарміце бяздомнае кацяняці ці шчанюка… Спіс можна працягваць доўга. Усё гэта зойме мала часу і намаганняў, але эфект будзе каласальным. Бо з кожным такім, простым па сутнасці, учынкам становіцца камусці лепш, а значыць - і больш дабрыні ў свеце. Важна яшчэ памятаць, што такімі справамі - праявамі спагадлівасці, сімпатыі, шчодрасці, прыязнасці, кахання, высакароднасці - мы вучым рабіць дабро і нашых дзяцей.

5 лістапада ў цэнтральнай раённай бібліятэцы прайшла экскурсія па бібліятэцы і экскурс у «Творчасць Уладзіміра Рыгоравіча Сайко». Слухачамі былі навучэнцы Валожынскага сельскагаспадарчага прафесійнага ліцэя.

Супрацоўнікі бібліятэкі распавялі навучэнцам пра гісторыю бібліятэкі, расказалі рабятам аб фондзе бібліятэкі, паказалі сховішча бібліятэкі. Супрацоўнікі бібліятэкі таксама распавялі пра творчасць мясцовага мастака Уладзіміра Рыгоравіча Сайко і распавялі яго біяграфію, азнаёмілі навучэнцаў з некаторымі яго працамі.

У канцы першай чвэрці самыя актыўныя і старанныя ўдзельнікі хору хлопчыкаў «Fortis» Ракаўскай дзіцячай школы мастацтваў атрымалі ад дырэктара сертыфікат на наведванне мінскага цэнтра акіянаграфіі. На канікулах хлапчукі са сваім кіраўніком Русецкай Аленай Мікалаеўнай, пры падтрымцы аддзела ідэалагічнай работы, культуры і па справах моладзі Валожынскага райвыканкама, які дапамог арганізаваць транспарт для калектыву, паехалі ў Мінск на экскурсію «Беларусь – радзіма марскіх герояў», якая праводзіцца ў рамках Года гістарычнай памяці. Хлопчыкі ўбачылі мадэлі падводных лодак, даследчых судоў, батыскафаў, макеты флоцкіх атамных рэактараў і ледаколаў, пазнаёміліся з біяграфіямі вядомых беларускіх маракоў, сфатаграфаваліся ў падводным рыштунку. Але больш за ўсё ім спадабаліся жывыя экспанаты, прадстаўнікі мораў і акіянаў, якія жывуць у міні-акіянарыуме: чарапаха Пелагея, драпежныя амазонскія піранні і лагодныя рыбкі-клоўны, а таксама пірацкі папугай Флінт.

З цэнтра акіянаграфіі, навучэнцы з'ехалі ў выдатным настроі і з жаданнем і далей спасцігаць асновы харавога мастацтва, сумяшчаючы заняткі ў хоры з выездамі калектыву на цікавыя, не толькі творчыя, але і такія пазнавальныя мерапрыемствы.

7 лістапада 2022 года на беразе вадасховішча Вяча ў Мінскім раёне ўпершыню адбылося ўнікальнае спаборніцтва – чэмпіянат па рубцы дроў сярод журналістаў і блогераў з удзелам Кіраўніка дзяржавы. У рамках мерапрыемства былі арганізаваны канцэрты з удзелам заслужаных, народных і прафесійных калектываў, адным з якіх была народная арт-група «Журавінка» ДУК «Івянецкі Дом культуры».

Улетку хлопцы працавалі ў сэрвісным, экалагічным і сельскагаспадарчых атрадах. На тэрыторыі раёна працавала 107 чалавек у 9 атрадах.

Лепшыя па выніках працы адзначаны дыпломамі, узнагародамі і памятнымі падарункамі ад раённага камітэта ГА «БРСМ», прафсаюзаў работнікаў аграпрамысловага комплексу, першаснай прафсаюзнай арганізацыі Валожынскага ЖКГ, сельскагаспадарчых арганізацый ААТ «Агра-Дубінское», ДП «Гарадзькоўскае».

Крыніца: valozhin.by

15 студзеня 2023 года Мінскай вобласці споўніцца 85 гадоў

Сёння мы пачынаем цыкл публікацый, прысвечаны юбілейнай даце. Цікавыя гістарычныя звесткі прадастаўлены Валожынскім краязнаўчым музеем.

Міншчыну па праве называюць сэрцам Беларусі, яна – цэнтральная, самая вялікая па тэрыторыі вобласць Рэспублікі Беларусь, агульная плошча якой складае амаль 40 тысяч квадратных метраў.

Шлях станаўлення Мінскай вобласці досыць складаны, шматгранны, багаты на падзеі. Пасля Кастрычніцкай рэвалюцыі на тэрыторыі Мінскай губерні ўсталявалася Савецкая ўлада. Была створана новая сістэма адміністрацыйна-тэрытарыяльнага дзялення, якая прадугледжвала стварэнне акруг замест паветаў, раёнаў – замест валасцей, стварэнне сельсаветаў. І вось 15 студзеня 1938 года Першая сесія Вярхоўнага Савета СССР прыняла Пастанову “Аб змяненні і дапаўненні ў артыкулы Канстытуцыі СССР “Аб увядзенні ў БССР абласнога адміністрацыйнага дзялення”, згодна з якім была створана Мінская вобласць. Тэрыторыя вобласці ахоплівала больш за 27 тысяч квадратных кіламетраў, абласным цэнтрам з’яўляўся горад Мінск. У склад Мінскай вобласці ўвайшоў 21 раён.
На сённяшні дзень у Мінскай вобласці 1 горад абласнога падпарадкавання (Жодзіна), 22 раёны, у тым ліку і наш, 23 гарады раённага значэння, 18 пасёлкаў гарадскога тыпу, 216 сельскіх Саветаў, 5 пасялковых Саветаў, 5177 сельскіх населеных пунктаў, у тым ліку 307 аграгарадкоў. Насельніцтва Мінскай вобласці на 1 студзеня 2022 года складала 1 мільён 465 тысяч 755 чалавек, з гэтай колькасці гарадское насельніцтва складае 803 тысячы 870, вясковае – 661 тысячу 885 чалавек.
Гісторыя Мінскай вобласці – гэта неад’емная частка гісторыі нашай краіны, нашай дзяржавы і беларускага народа, а таксама нашай любай Валожыншчыны.

15 студзеня 1940 года падпісаны Указ Вярхоўнага Савета БССР, згодна з якім быў утвораны

Валожынскі раён.

За ўсе дзесяцігоддзі, якія мінулі з таго часу, наша зямля перажыла цяжкія гады ваеннага ліхалецця, даволі працяглы перыяд аднаўлення,  стабілізацыі народнай гаспадаркі і культурнага развіцця. Архіўныя дакументы данеслі да нас шмат цікавых і важных звестак з гісторыі Валожыншчыны.

У даваенны перыяд адбывалася развіццё сельскай гаспадаркі, прамысловасці, фарміравання сферы абслугоўвання. Былі створаны 4 калгасы, машынна-трактарная станцыя, 51 бясплатная школа, 8 лячэбных устаноў, 2 аптэкі. У Валожыне быў арганізаваны райпрамкамбінат, які вёў памол зерня і распілоўванне лесу для насельніцтва, меў механічны і кавальскі цэхі. У раёне дзейнічалі 12 прыватных млыноў, 4 лесазаводы, мэблевая фабрыка.

Аднак гэту мірную, стваральную працу абарвала Вялікая Айчынная вайна. Ужо 26 чэрвеня 1941 года ўся тэрыторыя раёна была акупіравана фашысцкімі захопнікамі. Жыхары Валожыншчыны са зброяй у руках падняліся на абарону роднай зямлі, а нашы лясы ператварыліся ў партызанскі край. Зямля Валожыншчыны з першых дзён гітлераўскага нашэсця апынулася ў агні пажарышчаў і жорсткіх абарончых баёў. З першых дзён немцы ўстанавілі тут жорсткі рэжым, так званы “новы парадак”.

 Цяжка дасталася перамога над ворагам. За гады гітлераўскай акупацыі ў раёне былі знішчаны больш за 8 тысяч чалавек мірнага насельніцтва. У Валожыне, Ракаве, Івянцы, Вішневе, Забрэззі былі створаны канцэнтрацыйныя лагеры смерці, дзе па-зверску былі знішчаны каля 6 тысяч мірных грамадзян. Разам з жыхарамі спалены вёскі Доры, Кражына, Мішаны, Янушкавічы, дзясяткі іншых вёсак і сотні хутароў. Каля 2 тысяч маладых людзей вывезена на катаржную працу ў Германію, каля 1 тысячы валожынцаў загінулі на франтах Вялікай Айчыннай.

У разгром фашысцкай Германіі свой уклад унеслі нашы землякі – генералы Міхаіл Букштыновіч і Антон Гасціловіч, партызанскія сувязныя з Івянца Казімір і Люцыя Дзяржынскія, пяршайская піянерка Ядзя Трацэўская, герой-разведчык Аляксей Бацян і сотні радавых грамадзян раёна. Сярод удзельнікаў Вялікай Айчыннай вайны 53 валожынцы ўзнагароджаны ордэнам Айчыннай вайны I ступені, 307 – ордэнам Айчыннай вайны II ступені, 24 чалавекі – ордэнам Чырвонай Зоркі, 21 чалавек – ордэнам Славы, медалём “За перамогу над Германіяй” – 371 жыхар раёна.

Валожынскі раён быў вызвалены ад нямецка-фашысцкай акупацыі часцямі 3-га Беларускага фронта 7 ліпеня 1944 года.

Жыццё паступова вярталася ў мірнае рэчышча. Сельская гаспадарка раёна складалася з 11215 індывідуальных гаспадарак, 50 працэнтаў з якіх не мелі ўласнай зямлі, а 6 працэнтаў – наогул не мелі ніякай хатняй жывёлы.

У 1944 годзе пачалі працаваць раённая бальніца, сельскія амбулаторыі. У жніўні гэтага года пачаў сваю працоўную біяграфію масласырзавод, які ўжо ў першыя дні вырабляў па 50 кілаграмаў масла. Адкрываліся аўтобусныя маршруты, пачалася радыёфікацыя населеных пунктаў. У 1945 годзе працавалі 66 школ, пры якіх адкрываліся так званыя “школы граматы” для дарослага насельніцтва.

Да 1946 года адноўлены даваенныя пасяўныя плошчы, МТС, створаны тры новыя калгасы. Бедным і малазямельным сялянам раздадзены 4521 гектар зямлі, адбудаваны 1186 дамоў, уведзены ў дзеянне 6 млыноў, 4 маслазаводы. Адкрыты 9 медыцынскіх устаноў.

У чэрвені 1946 года выканкам Валожынскага Савета дэпутатаў працоўных і бюро райкама партыі прынялі рашэнне ўключыцца ў работу па нарыхтоўцы і вывазцы лесу для ўзнаўлення горада Мінска і будаўніцтва Мінскага трактарнага завода. На працягу трох летніх месяцаў тут працавалі сотні падвод.

У верасні 1946 года ў Валожыне запрацаваў  кінатэатр “Радзіма”, які знаходзіўся па вуліцы Савецкай (зараз тэрыторыя СШ № 1). Глядзельная зала была разлічана на 200 месцаў. Кожны дзень дэманстраваліся 3 сеансы, паказваліся 2 кінафільмы: “Волга-Волга”, “Давід-Бек”. 

У 1947 годзе ў Валожынскай машынна-трактарнай станцыі працавалі 5 колавых трактароў, 4 зерневыя малатарні, 1 лакамабіль, 12 трактарных плугоў.

Да сярэдзіны 1948 года цалкам былі ліквідаваны зямлянкі, у якіх пасля вайны жылі людзі. Пачалі працаваць колава-абозныя і слясарна-кавальская майстэрні, устаноўлены 3 піларамы, сталярна-бандарны цэх, 3 цэглавыя заводы. У гэтым жа годзе быў арганізаваны прамкамбінат пры райспажыўтаварыстве і ўступіла ў дзеянне торфапрадпрыемства “Дубіна”.

У 1948 годзе ў Стайкаўскім сельсавеце ўтвораны тры новыя калгасы. 85 гаспадарак вёскі Стайкі аб’ядналіся ў калгас “Чырвоны Кастрычнік”. У вёсцы Чартавічы арганізаваны калгас імя Варашылава. Калгас “Перамога” створаны ў вёсцы Петрашунцы. У гэты ж час 27 сем’яў жыхароў вёскі Лоск аб’ядналіся ў калектыўную гаспадарку. Калгас быў названы імем Ф. Э. Дзяржынскага.

У маі 1948 года ў зале кінатэатра “Радзіма” адбыўся першы раённы піянерскі злёт. На ім былі падведзены вынікі абласнога конкурсу на лепшага юнага садавода, у якім піянеры Валожынскага раёна заваявалі 1-е месца.

У кастрычніку 1949 года адкрылася гарадская, а ў хуткім часе і дзіцячая бібліятэкі.

(Працяг будзе)

Крыніца: valozhin.by

У Стоўбцах адбылося адкрыццё новай дзіцячай школы мастацтваў. У адукацыйнай установе дзеці могуць навучацца па розных творчых напрамках. На базе школы мастацтваў дзейнічаюць фартэпіяннае, струннае, харэаграфічнае, тэатральнае, выяўленчае і многія іншыя аддзяленні.

Беларусь плануе ў 2022 годзе экспартаваць прадуктаў харчавання на $8 млрд. Аб гэтым Прэзідэнт Беларусі Аляксандр Лукашэнка заявіў на цырымоніі афіцыйнага запуску вытворчасці камбікармоў і амінакіслот БНБК у Пухавіцкім раёне, перадае карэспандэнт БЕЛТА.