Гэта значнае і хвалюючае для кожнага жыхара нашай краіны свята. Мы адзначаем яго як даніну памяці і глыбокай павагі да слаўных абаронцаў Айчыны. Праходзяць дзесяцігоддзі, змяняюцца пакаленні, але Вялікая Перамога, як сімвал нацыянальнага гонару, воінскай славы і доблесці народа, застаецца навечна ўпісанай у гераічны летапіс нашай Радзімы!
Дарагія ветэраны, мы шануем і памятаем вашы франтавыя і працоўныя подзвігі. Нізкі ўсім вам паклон за тое, як самааддана, гераічна на фронце і ў тыле набліжалі доўгачаканы Дзень Вялікай Перамогі, як аднаўлялі краіну з руін. Здабыты вамі мір і сёння натхняе сучаснікаў на новыя здзяйсненні, умацоўвае дух, дапамагае пераадольваць цяжкасці і ісці наперад. Дзень Перамогі – гэта тое, што аб’ядноўвае нас і робіць непахіснымі перад любымі выпрабаваннямі. І сёння наша задача – не даць маладым пакаленням забыцца пра тое, якой цаной, якой выключнай мужнасцю, адзінствам волі і сілай духу была заваявана Перамога.
Паважаныя ветэраны, жыхары і госці Валожыншчыны, у гэта вялікае свята ад усёй душы жадаем вам здароўя, дабрабыту, мірнага неба і невычэрпнай веры ў лепшую будучыню.
З Днём Перамогі ўсіх!
Старшыня раённага выканаўчага камітэта Яўген КРУКОВІЧ,
старшыня раённага Савета дэпутатаў
Пётр БІБІК