Валожынскі філіял ДП «Мінаблпаліва» ў сваім арсенале ўзнагарод мае больш за паўсотню грамат за 1-е месца па эканамічных паказчыках. І не дзіва, што працаваць тут людзі лічаць за гонар. Нават Стаўбцоўскі ўчастак, які некалькі гадоў таму быў далучаны да Валожынскага і знаходзіўся не ў лепшым стане, вырваўся ў перадавікі. Заробкі таксама не з горшых – па выніках мінулага года ў сярэднім амаль 950 рублёў.
Калектыў пад кіраўніцтвам М. І. Радыны адзінаццаць разоў перамагаў на абласным узроўні, паказваючы найлепшыя вынікі працы. Не стаў выключэннем і мінулы год: 1-е месца ў вобласці і лепшая арганізацыя паліўна-энергетычнага комплексу раёна. Некаторыя лічбы, у прыватнасці, колькасць рэалізаваных насельніцтву дроў, перавышае запланаваную больш чым у два разы і дасягае 216 працэнтаў. Дапамаглі дабіцца такога выніку кацельныя гаспадаркі воінскіх часцей – менавіта вайскоўцы ў пачатку ацяпляльнага сезона зрабілі вялікія заказы на дровы. Расце грашовая выручка і ад аказання транспартных паслуг, рэнтабельнасць вытворчасці.
На вытворчым працэсе хацелася б спыніцца асобна. Філіял адзіны ў сталічным рэгіёне, які займаецца выпускам пялетаў. Гэтыя сухія шарыкі, спрасаваныя з саломы, не залежваюцца на паліцах супермаркетаў і выкарыстоўваюцца не толькі як экалагічны від паліва, але і як напаўняльнік біятуалетаў для жывёлы. Але асноўным пакупніком пялетаў летась былі партнёры з Літвы. Еўрапейцы набылі амаль 500 тон гранул на агульную суму 36000 еўра.
А вось нашы грамадзяне пакуль што перавагу аддаюць дровам і торфабрыкету. 3500 домаўладанняў маюць патрэбу ў гэтых традыцыйных матэрыялах для печаў і грубак. Калі торф ужо ў гатовым выглядзе паступае з завода «Нёман», то дровы неабходна нарыхтаваць. Летась 2756 кубічных метраў драўніны прадаставіў лясгас, а 2456 кубічных метраў работнікі філіяла назапасілі самастойна.
Для забеспячэння патрэб насельніцтва задзейнічаны 25 адзінак тэхнікі. Машынна-трактарны парк прадпрыемства, па словах Міхаіла Ігнацьевіча, цалкам укамплектаваны і падтрымліваецца ў выдатным стане.
Фінансавая стратэгія філіяла сфарміравалася больш за 15 гадоў таму, калі кіраўніком стаў М. І. Радына. І час пацвердзіў правільнасць яго падыходу. З эканамічнай дыстанцыі зараз сходзяць многія паспяховыя ў мінулым прадпрыемствы, а Валожынскі філіял ДП «Мінаблпаліва» стабільна набірае абароты. Галоўны сакрэт – увага да кожнага працаўніка, выкарыстоўваць любую магчымасць для прыбытку, нават калі выгада не імгненная, а ў далёкай перспектыве.
Добрая рэпутацыя пра прадпрыемства склалася і ў кліентаў. Без затрымак, у любы дзень і нават у любы час сутак па першым сігнале дастаўляліся ў самыя аддаленыя вёскі дровы, брыкет. Актыўна займаюцца дзейнасцю, якая не звязаная на прамую з палівам, але не менш запатрабаваная ў сельскай мясцовасці: развозка гравію, угнаенняў, дастаўка з палёў на перапрацоўку цукровых буракоў, удзел у пасяўных і ўборачных кампаніях, нарыхтоўка кармоў.
Валожынскі філіял ДП «Мінаблпаліва» не так даўно перажыў аптымізацыю і зараз штат калектыву складаецца з 40 чалавек. Кожнаму з іх хапае клопату і ўвагі з боку кіраўніцтва прадпрыемства. Прадуманы падвоз і адвоз работнікаў да месца працы, існуе наладжаная сістэма аказання матэрыяльных дапамог, на ўсіх аб’ектах створана ўтульнасць і зручнасць для вытворчай дзейнасці і адпачынку.
