120-годдзе з дня нараджэння слыннага беларускага пісьменіка Кандрага Крапівы народнае літаратурна-мастацкае аб’яднанне “Рунь” Валожынскага раённага цэнтра культуры вырашыла адзначыць конкурсам выканаўцаў яго твораў. Да ўдзелу ў конкурсе запрасілі вучняў школ Валожыншчыны.
З хваляваннем чакалі свайго выхаду на сцэну юныя канкурсанты, а ў зале РЦК цёпла і шчыра сустракалі кожнае выступленне гледачы і журы.
На суд журы выносіліся як творы ў выкананні аднаго чытальніка, так і інсцэніраваныя байкі “Сабачая дружба”(вучні гімназіі №1 г.Валожына), “Дэкрэт” (СШ№2), “Заява” , “Вол і Авадзень” (Івянецкая СШ). А байку “Мурашка і Жук” прадставілі, кожны па- свойму, вучні ажно трэх школ, лепшай сярод якіх прызнана інсцэніроўка Вішнеўскай СШ. Дарэчы, вучні гэтай школы падрыхтавалі таксама ўрывак з п’есы К.Крапівы “Пяюць жаваранкі” , якім і пачаўся конкурс. А завяршылі конкурсныя выступленні вучні СШ №1 г.Валожына ўрыўкам з п’есы “Партызаны” .
Як адзначыла журы, уручаючы лепшым канкурсантам і найбольш актыўным установам адукацыі дыпломы і падарункі аддзела ідэалагічнай работы, культуры і па справах моладзі райвыканкама, конкурс выліўся ў сапраўднае свята творчасці Кандрата Крапівы і раскрыцця артыстычных талентаў школьнікаў.
Валянціна Гіруць-Русакевіч.
