У Валожынскім раённым цэнтры культуры падведзены вынікі чарговага літаратурнага конкурсу “Маладыя галасы”, якое штогод ладзіць сярод дзяцей і моладзі (да18 гадоў) народнае літаратурна-мастацкае аб’яднанне “Рунь”.
Сёлетні конкурс праходзіў па тэмах: “Табе, наш родны мілы краю”, “Пад зоркай кахання” і “Мы жартуем, мы смяёмся”.
Журы конкурсу ў складзе якога былі вядучы спецыяліст аддзела ідэалагічнай работы, культуры і па справах моладзі Валожынскага райвыканкама Ганна Канановіч, супрацоўнік раённай газеты “Працоўная слава” Валянціна Краўневіч, члены Мінскага абласнога аддзялення Саюза пісьменнікаў Беларусі Марыя Шакун і Валянціна Гіруць- Русакевіч (член савета і кіраўнік “Руні”), вызначылі папярэдне лепшыя творы па кожнай тэме. А ў дзень падвядзення вынікаў конкурсу ўручылі іх аўтарам дыпломы аддзела ідэалагічнай работы, культуры і па справах моладзі райвыканкама і сувеніры.
Па першай тэме дыпломамі трэцяй ступені адзначаны пяцікласніца Пяршайскага НПК дзіцячы сад-сярэдняя школа Паліна Калясінская і вучаніца 8 “В” класа Івянецкай СШ Аліна Чышэвіч, дыплом за 2-е масца атрымала Елізавета Валашэнка (9 “А” клас гімназіі №1 г.Валожына). А пераможным аказаўся верш “Дом пад аблокамі” Аляксея Пінчука -- першакурсніка Валожынскага сельскагаспадарчага прафесійнага ліцэя.
Роднай прыродзе прысвяціла свае два невялічкія вершы і вучаніца 2 “Б” класа гімназіі №1 г.Валожына Люба Русакевіч, якая адзначана дыпломам у намінацыі “Самы юны ўдзельнік” .
Сярод аўтараў празаічных твораў названай тэматыкі ўзнагароды атрымалі дзесяцікласніца Суднікаўскай СШ Анастасія Дуброўская (1-е месца), вучань 7 “А” класа Івянецкай СШ Аляксандр Адамовіч (2-е месца) і яго аднакласніца Дар’я Пясецкая (3-е месца).
У тэме “Пад зоркай кахання” перамогу святкавалі Вікторыя Такушэвіч (дзесяцікласніца Яршэвіцкага НПК дзіцячы сад-сярэдняя школа), у яе 1-е месца, і зноў жа Аляксей Пінчук, які на гэты раз атрымаў дыплом другой ступені.
А лепшымі жартоўнікамі аднадушна прызнаны сямікласнік Мікалай і пяцікласніца Паліна Калясінскія, якія вучацца ў Пяршайскім навучальна-педагачічным комплексе дзіцячы сад-сярэдняя школа.
Вершаваная і празаічная спроба пяра адзначаных юных творцаў будзе надрукавана ў раёнай газеце “Працоўная слава”, іншых перыядычных выданнях. А з часам іх творы ўвойдуць у другі зборнік, які ўкладаецца з вершаў і прозы пераможцаў і дыпламантаў “Маладых галасоў”.
