Спакон вякоў наш народ рупліва зберагаў самабытнасць сваёй нацыянальнай культуры. Багатае і разнастайнае народнае мастацтва беларусаў!
Мы, нашчадкі нашых дзядоў і прадзедаў, таксама стараемся зберагаць і прымнажаць сваю спадчыну. А спрыяюць гэтаму фестывалі, конкурсы, фальклорныя святы, якія праводзяцца ў нашым раёне.
22 лістапада, у нядзелю, Сакаўшчынскі сельскі Цэнтр культуры запрасіў на 9 -е раённае свята фальклору “З крыніц жыватворных”. Гасцінныя гаспадары ўстановы ў асобе дырэктара Алены Феліксаўны Рыснік і яе калег шчыра сустракалі ўдзельнікаў свята, якія прыбывалі з розных куткоў раёна.
Да гэтага дня была аформлена цікавая выстава гурткоўцаў СЦК і іх кіраўнікоў. Уразіла выстава вышыўкі Алены Феліксаўны Рыснік і выстава лялькі, паясоў Наталлі Феліксаўны Хаванскай і яе выхаванцаў. Зала, сцэна і фае аформлены ў народным стылі.Цёплая і ўтульная зала спрыяла добраму і творчаму настрою гасцям- удзельнікам і мясцовым жыхарам-гледачам.
Адзін за адным выходзілі на сцэну калектывы і асобныя выканаўцы. Гучалі працяжныя абрадавыя і жартоўныя песні, побытавыя танцы застаўлялі ісці ў скокі нават гледачоў. Сярод нашых удзельнікаў свята былі: вядомы Заслужаны аматарскі калектыў Рэспублікі Беларусь фальклорны ансамбль “Гасцінец” Ракаўскага Цэнтра народнай творчасці (кіраўнік Л.С.Пятроўская), старэйшы фальклорны калектыў “Сівічанка” (кіраўнік І.В.Лоўчая) Сівіцкай сельскай бібліятэкі -клуба і ўдзельнікі аматарскага аб’яднання “Бацькаўшчына” Дубінскога СЦК (кіраўнік Т.У. Каляда). Сярод музыкаў-самавукаў цешыў сваёй арыгінальнай ігрой на самаробных інструментах “чалавек-аркестр” Яўген Іванавіч Зінкевіч з в. Бабры і дэбютант свята жыхар райцэнтра, гарманіст Пётр Іванавіч Скапец. Амаль кожная клубная ўстанова прадставіла свае калектывы з народнымі песнямі, танцамі, жартамі.Завяршылася праграма выступленнем вакальнай групы хору ветэранаў працы “Спяваючыя сэрцы” РЦК(кіраўнік Я.І. Харук).
Начальнік аддзела ідэалагічнай работы, культуры і па справах моладзі Вікенцій Мікалаевіч Адамовіч адкрыў свята і на працягу яго, пасля выступленняў калектываў, уручаў дыпломы, знаходзячы кожнаму трапныя, падбадзёрваючыя словы-пажаданні.
Пасля асноўнай праграмы свята адбыўся майстар -клас па развучванню побытавых танцаў сярод удзельнікаў і гледачоў, які правяла са сваім калектывам кіраўнік “Гасцінца” Лізавета Станіславаўна Пятроўская.
