Работнікі падатковых органаў адзначаюць сваё прафесійнае свята ў другую нядзелю ліпеня. На гэтых людзей ускладзены адказны абавязак – сачыць, каб фізічныя і юрыдычныя асобы папаўнялі дзяржаўную скарбонку, згодна з заканадаўствам, і не парушалі ўстаноўленыя нарматывы грашова-таварных адносін.
Штат раённай інспекцыі Міністэрства па падатках і зборах налічвае зараз больш за 20 чалавек. Кіруе імі вопытны спецыяліст сваёй справы з 26-гадовым стажам, эканаміст па адукацыі Галіна Станіславаўна Шабаль. Дзякуючы агульнай дзейнасці работнікаў службы, у бюджэт раёна штогод паступаюць запланаваныя грошы. А гэта важкі ўклад – амаль 28 мільёнаў рублёў, якія размяркоўваюцца на патрэбы сацыяльнай сферы, ідуць на фінансаванне эканамічных праектаў і, такім чынам, павышаюць узровень жыцця жыхароў Валожыншчыны.
У першым паўгоддзі раённая інспекцыя працавала ў адпаведнасці з патрабаваннямі. Не сакрэт, што ў сферы падаткаабкладання недахопы сустракаюцца. Сёлета выяўлены недакладнасці, якія датычацца парушэння правіл перавозкі пасажыраў, здачы жылля ў наём, незарэгістраванай прадпрымальніцкай дзейнасці. Для таго, каб выкараніць падобнае, работнікі інспекцыі па падатках і зборах праводзяць растлумачальную работу сярод суб’ектаў гаспадарання, фізічных асоб. Дзейнасць сваю будуюць па прынцыпе: найперш – вучыць, а не прымяняць меры ўздзеяння.
Выніковая праца падатковага інспектара залежыць ад узроўню яго ведаў, умення працаваць з людзьмі і знаходзіць індывідуальны падыход. Словам, гэта павінен быць чалавек, улюбёны ў сваю работу. Менавіта такімі з’яўляюцца начальнікі структурных падраздзяленняў Таццяна Анатольеўна ЯКУТОВІЧ, Галіна Васільеўна ЗЯНЬКО, Аксіння Станіславаўна ГАРУНОВІЧ.
Алена ЗБІРЭНКА,
