Воложинский районный
исполнительный комитет

Тэатралізаваны канцэрт-рэквіем «О, як нам вас не стае - кожны чацвёрты!» - даніна памяці ўсім ахвярам і героям Вялікай Айчыннай вайны, мерапрыемства новага фармату і, магчыма, закліканае пакласці традыцыю правядзення такіх памятных мерапрыемстваў напярэдадні вялікага дня – Дня Перамогі.

Паэтычная аснова сцэнарыя канцэрта – твор «Рэквіем па кожным чацвёртым» Анатоля Вярцінскага. «Кожны чацвёрты» - гучыць рэфрэнам на працягу канцэрта, падкрэсліваючы, што гісторыя вайны не скончана, не забыта. Увогуле, увесь канцэрт пабудаваны па творах беларускіх паэтаў: Генадзя Кляўко, Генадзя Бураўкіна, Наталлі Кандрашук, Надзеі Верас, Кастуся Кірэенкі, Аркадзя Куляшова, Эдзі Агняцвет і інш. Характэрна тое, што ў канцэрце гучаць не толькі вершы знакамітых беларускіх паэтаў, але і аўтарскія вершы нашага земляка – Мікалая Майсюка. Некалькі твораў перакладзены на беларускую мову таксама нашым земляком – Аляксеем Траццяком. Творы дыкламуюць Людміла Давідоўская, Валянціна Шыманская, Антон Шышмароў, Таццяна Вошкат, Наталля Радкевіч.

 У канцэрце гучаць як шырока вядомыя музычныя творы, так і новыя творы сучасных беларускіх аўтараў. У канцэрце прымаюць удзел: народны ансамбль народнай песні «Спадчына», народны жаночы вакальны ансамбль «Аліра», узорная студыя эстраднага вакалу «КЛИО», Мілана Іванова, Дзмітрый Шайпак, Мар’я Дзісяк, Юлія Наўмовіч, салісты Капыльскага РЦК – Вячаслаў Курчык, Захар Нікіценка, Аляксандр Ермакоў, Дзяніс Сельвановіч, харэаграфічныя калектывы Капыльскага РЦК і Капыльскай ДШМ. Гучаць вершы ў выкананні дзяцей – пераможцаў раённага агляду-конкурсу патрыятычнай творчасці «ПАТРИОТ.BY»: Аліны Сінюк, Кірыла Паўлюкевіча, Станіславы Чэрнік. Масоўкай выступаюць удзельнікі ваенна-патрыятычнага клуба «Рэзерв» УА «Капыльскі дзяржаўны каледж», работнікі клубных устаноў раёна з дзецьмі.

Асноўная ідэя канцэрта - тэма памяці і чалавечай годнасці. Ён прысвечаны ўсім тым, хто сышоў, але чыё жыццё і прынесеная ахвяра не аддаюцца забыццю, а працягваюць гучаць у сэрцах людзей. Гэта не толькі літаратурна-музычнае памінанне, але і разважанне аб памяці як сіле, здольнай пераадолець забыццё, аб кошце, які быў заплачаны за Мір, аб каштоўнасці кожнага чалавечага жыцця.

Рэжысёр праекта – мастацкі кіраўнік Капыльскага раённага цэнтра культуры Людміла Давідоўская.

Запрашаем наведвальнікаў далучыцца да творчага занятку, прысвечанага памяці і гісторыі. Падчас майстар-класа вы створыце ўласную святочную паштоўку, аздобленую фотавыявамі беларускіх пісьменнікаў і паэтаў, на лёсы якіх паўплывалі падзеі Вялікай Айчыннай вайны, а таксама мініяцюрнымі выявамі іх твораў. У працы будуць выкарыстаны копіі фотаздымкаў з фондаў музея, што надасць кожнай паштоўцы асаблівую каштоўнасць і глыбіню.

Удзельнікам прапануюць розныя варыянты афармлення і дэкаратыўныя элементы, дзякуючы чаму кожная праца атрымаецца ўнікальнай і будзе адлюстроўваць індывідуальны густ яе аўтара. Працэс будзе суправаджацца жывымі і цікавымі каментарыямі супрацоўніка музея пра творчасць і жыццё беларускіх аўтараў, што дазволіць не толькі праявіць сябе ў творчасці, але і дакрануцца да літаратурнай спадчыны.

Працягласць: 30–50 хв.

Удзел па папярэднім запісе для груп ад 5 чал.: +375 17 363-56-21.

Хочаце стварыць нешта сваімі рукамі і адначасова дакрануцца да гісторыі? Запрашаем на творчы і пазнавальны майстар-клас, дзе мастацтва спалучаецца з памяццю пра важныя падзеі!

Што вас чакае:

• Стварэнне ўнікальнага магніта сваімі рукамі пад кіраўніцтвам супрацоўніка музея.
• Знаёмства з беларускімі пісьменнікамі, якія ўнеслі ўклад у Перамогу.
• Гатовы магніт, які стане сімвалічным сувенірам або цёплым падарункам.

Усе матэрыялы – ужо падрыхтаваны для вас.

Працягласць: 30–45 хвілін.

Удзел па папярэднім запісе для груп ад 5 чалавек: +375 17 363-56-21.

8 мая 2026 года а 17-й ў Дзяржаўным літаратурна-мемарыяльным музеі Якуба Коласа пачынае працу часовая мастацка-дакументальная экспазіцыя “Вобразы мілыя роднага краю”, прысвечаная 100-годдзю з дня нараджэння вядомага беларускага мастака, педагога, заслужанага дзеяча мастацтваў Рэспублікі Беларусь Барыса Ўладзіміравіча Аракчэева (1926–2013). Выстава дазваляе прасачыць яго творчы шлях ад ранніх студэнцкіх работ да твораў, напісаных у апошнія гады жыцця, і раскрыць шматгранную асобу Мастака і Чалавека.

Экспазіцыя пабудавана як займальнае падарожжа па жыццёвым і творчым шляху Барыса Аракчэева. Прадстаўленыя работы дазваляюць убачыць, як развіваўся яго талент: ад ранніх навучальных прац у Беларускай акадэміі мастацтваў да сталай творчасці. Асаблівую каштоўнасць выставе надаюць дакументы, ілюстрацыі і асабістыя рэчы, якія дапамагаюць глыбей зразумець не толькі творцу, але і чалавека, чый лёс быў непарыўна звязаны з Беларуссю.

Нарадзіўшыся ў 1926 годзе ў Расіі, Барыс Аракчэеў звязаў свой лёс з Беларуссю, дзе атрымаў мастацкую адукацыю і дасягнуў прафесійных вышынь. Яго творчая спадчына, якая прадстаўлена ў музеях і галерэях краіны, а таксама на гэтай экспазіцыі, з'яўляецца каштоўным унёскам у беларускую культуру.

Невыпадкова, экспазіцыя размяшчаецца менавіта ў музеі Якуба Коласа, бо нягледзячы на розныя віды мастацтва, Мастака і Паэта аб'ядноўвае любоў да роднай зямлі і яе вобразнае пераасэнсаванне. Якуб Колас — прызнаны "пясняр нацыянальнай прыроды". Праз свае творы ён сфармаваў нацыянальнае пачуццё прыроды, паказаў яе глыбокую сувязь з чалавекам. Барыс Аракчэеў працаваў у жанры пейзажу і нацюрморта, прысвяціўшы мноства работ беларускім краявідам. Яго творчасць прасякнута любоўю да навакольнага свету, што сфармавалася з дзяцінства, і ўласцівым яму рэалістычным адлюстраваннем рэчаіснасці.

Сардэчна запрашаем!