Завяршыўся завочны абласны адборачны тур рэспубліканскага маладзёжнага конкурсу “Новыя галасы роднай краіны”.
Валожыншчыну на вобласці прадстаўлялі Аляксандр Сабалеўскі, саліст Івянецкага ГПДК, Юлія Скурко, выкладчык Ракаўскай ДШМ, і Сяргей Мянцюк, фельчар Валожынскай ЦРБ. Вакальныя даныя самадзейных спевакоў ацэньвала прадстаўнічае журы ў складзе знакамітага беларускага кампазітара Яўгенія Алейніка, дырыжора, прафесара ўніверсітэта культуры і мастацтва Вячаслава Бартаноўскага і выкладчыкаў музычных школ мастацтваў сталіцы.
Удзельнічалі 129 прадстаўнікоў з усіх рэгіёнаў Міншчыны. Творчыя здольнасці нашых артыстаў былі высока ацэнены. У выніку ўдзел у абласным этапе прымуць А. Сабалеўскі і С. Мянцюк, імёны якіх пакуль невядомы шырокай публіцы. А вось Ю. Скурко з’яўляецца прафесіянальнай вакалісткай і не раз прымала ўдзел не толькі ў рэспубліканскіх, але і міжнародных конкурсах, і, дарэчы, паспяхова.
Справаздачны канцэрт другога абласнога этапу рэспубліканскага конкурсу “Новыя галасы роднай краіны” пройдзе 10 красавіка ў Маладзечне. Конкурс праводзіцца ў рамках Года моладзі пад дэвізам “Адкрываем новыя імёны разам”. Ініцыятарам яго выступіла Федэрацыя прафсаюзаў Беларусі пры падтрымцы Міністэрства культуры і Нацыянальнай дзяржаўнай тэлерадыёкампаніі.
Алена ЗАЛЕСКАЯ
