Немагчыма сабе ўявіць жыццё дашкольнай установы без займальных свят і забаў. Мэта такіх мерапрыемстваў – фарміраванне асноў здаровага ладу жыцця, дапамога кожнаму дзіцяці адчуць сябе членам адной дружнай каманды, магчымасць раздзяліць разам з сябрамі радасць і адказнасць у дасягненні пастаўленай мэты і паказаць свае лепшыя якасці.
Асабліва дзецям падабаюцца забавы на свежым паветры, а калі гэта адбываецца ў зімовы перыяд, то эмоцыі перапаўняюць. Зімы ў апошнія гады не радуюць снегам, таму з вялікім энтузіязмам і натхненнем рабяты гуляюць у снежкі, катаюцца на санках, слізгаюцца па ледзяных дарожках, спрабуюць сілы ў кіданні шайбы ў хакейныя вароты. Яшчэ больш узнімаецца настрой дзетвары, калі да іх у госці завітаюць казачныя героі.
Пры правядзенні рухавых гульняў у хлопчыкаў і дзяўчынак фарміруюцца ўменні выкарыстоўваць набытыя навыкі ў жыццёвых сітуацыях, развіваюцца спрыт, хуткасць, яны становяцца дужымі, вынослівымі, навучаюцца дзейнічаць смела. Праяўляючы настойлівасць і самастойнасць, выхоўваецца пачуццё дружбы і таварыскасці. А гэта і ёсць галоўнае ў выхаванні будучых зорак беларускага спорту.
Наталля КАВАЛЕВІЧ,
кіраўнік фізічнага выхавання дашкольнага
цэнтра развіцця дзіцяці “Расінка”
