На Валожыншчыне прайшоў раённы этап фестывалю КВЗ “Таленавітая моладзь – таленавітая ва ўсім” сярод каманд устаноў адукацыі.
Асноўная мэта конкурсу – раскрыццё творчых здольнасцей вучняў, прыцягненне іх увагі да пытанняў выканання правіл пажарнай бяспекі, фарміраванне ў маладога пакалення культуры бяспекі жыццядзейнасці і папулярызацыя прафесіі выратавальніка-пажарнага.
Сёлета мерапрыемства адбылося ў дыстанцыйнай форме. Каманды прадставілі відэа сваіх выступленняў, дзе ў гумарыстычнай форме даводзілі, як правільна паводзіць сябе, каб не здарылася пажараў і розных іншых надзвычайных сітуацый.
Па выніках трох этапаў: “Прывітанне”, “Музычны біятлон” і “Музычнае хатняе заданне” 3-е месца заняла каманда Багданаўскага ВПК, 2-е – гімназіі № 1 г. Валожына, а пераможцамі сталі прадстаўнікі Дорскага ВПК. Жадаем рабятам поспеху ў абласным этапе конкурсу.
