Ініцыіраваная кіраўніком вобласці раптоўная праверка тэрытарыяльнай абароны на Валожыншчыне паказала: афіцэры запасу па першым закліку гатовы стаць плячом да пляча ў выпадку нечаканых ваенных дзеянняў, арганізаваць адпор ворагу і ўмела павесці за сабой людзей.
Мерапрыемствы ў рамках праверкі прайшлі на базе адасобленай групы ваеннага камісарыяту Маладзечанскага і Валожынскага раёнаў, сярэдняй школы № 2 райцэнтра, а таксама турыстычнага інфармацыйнага і рэкрэацыйнага цэнтра, а задзейнічанымі ў іх сталі прадстаўнікі многіх службаў і ведамстваў. Комплекснай арганізацыяй займаліся органы раённай улады на чале са старшынёй райвыканкама Яўгенам Круковічам. На першы ж заклік на зборы адгукнуліся прафесіяналы вайсковай справы і сапраўдныя патрыёты Радзімы – афіцэры запасу. Яны ж і паўдзельнічалі ў першасных мерапрыемствах камплектавання тэрытарыяльных войск Валожыншчыны, паказаўшы не толькі прыкладам, але і дзеяннямі, што ў выпадку любой раптоўнай знешняй ці ўнутранай пагрозы гатовы аператыўна прадаставіць свой вопыт і камандзірскі патэнцыял на карысць захавання цэласнасці і суверэнітэту Беларусі, жыцця і здароўя нашага мірнага, працавітага народу.
Тэкст і фота Сяргея САДОЎСКАГА
