Сёлета штогадовае свята дзяцінства свет адзначыць у 66-ы раз. Заснавана яно ў Парыжы рашэннем кангрэса Міжнароднай дэмакратычнай федэрацыі жанчын.
Да агульнага святкавання далучыцца і дзіцячы сад № 2 “Вясёлка” горада Валожына. Ініцыятыўныя педагогі па традыцыі рыхтуюць для маленькіх гарэз спецыяльную забаўляльную праграму. Зараз дашкольную ўстанову адукацыі наведваюць 136 хлопчыкаў і дзяўчынак. 22 выхаванцы сёлета развітаюцца з “Вясёлкай” – стануць першакласнікамі.
Садок наведваюць 19 дзяцей са шматдзетных сем’яў, для якіх прадугледжана 50-працэнтнае зніжэнне аплаты за харчаванне.
Атмасферу творчасці, радасці і добразычлівасці ствараюць 13 педагогаў. 69% з іх маюць вышэйшую профільную адукацыю. Ініцыятыўныя выхавальнікі рэгулярна арганізоўваюць выставы дзіцячых вырабаў і малюнкаў, праводзяць конкурсы, ладзяць ранішнікі і салодкія сталы, займаюцца з малышамі ў гуртках па інтарэсах, прывучаюць маленькіх непасед да дысцыпліны, прывіваюць фізічную загартоўку, імкнуцца даць дзеткам базавы багаж ведаў, неабходных для вучобы ў школе.
Алена Уладзіміраўна Махіна працуе выхавальніцай 31-ы год. Вопытны педагог ахвотна дзеліцца багатым прафесійным досведам з маладым спецыялістам Таццянай Сяргееўнай Кобзаравай, якая прыйшла ў педагогіку ў мінулым годзе.
