Для некаторых людзей догляд за ляжачымі хворымі – гэта работа. Але ніхто не застрахаваны ад неабходнасці даглядаць за кім-небудзь з раптоўна захварэўшых родных. Часам неабходнасць клапаціцца ўзнікае зусім нечакана: напрыклад, у выпадку, калі патрабуецца догляд пасля траўмы ці аперацыі.
Каб не разгубіцца ў такой сітуацыі і не дапусціць крытычных памылак, у Валожынскім тэрытарыяльным цэнтры сацыяльнага абслугоўвання насельніцтва з лістапада бягучага года ўводзіцца паслуга па навучанні членаў сям’і, якія ажыццяўляюць догляд за непрацаздольнымі грамадзянамі, навыкам догляду.
Да членаў сям’і адносяцца асобы, што знаходзяцца ў кроўнай сувязі з тым чалавекам, за якім імі будзе ажыццяўляцца догляд, а таксама іншыя асобы, прызнаны ў судовым парадку членамі сям’і, што ажыццяўляюць такі догляд. Да патэнцыяльных атрымальнікаў сацыяльнай паслугі таксама адносяцца грамадзяне, якія ажыццяўляюць догляд за інвалідам I групы ці асобай, што дасягнула 80-гадовага ўзросту з атрыманнем дапамогі па доглядзе.
Дагавор на аказанне сацыяльнай паслугі цэнтрам заключаецца атрымальнікам паслугі на падставе яго пісьмовай заявы. Дадзеная паслуга аказваецца бясплатна.
Пералік дакументаў, якія неабходна прадаставіць у цэнтр для заключэння дагавора на аказанне такой паслугі: дакумент, які зацвярджае асобу грамадзяніна; пісьмовая заява.
У працэсе практычных заняткаў спецыяліст цэнтра, які прайшоў навучанне, раскажа і пакажа на практыцы, што патрэбна ведаць і ўмець, каб забяспечыць якасны догляд за хворым і пры гэтым захаваць уласнае здароўе. Практычныя заняткі будуць праводзіцца ў групавой ці індывідуальнай форме, у спецыяльна абсталяваным кабінеце цэнтра ці непасрэдна па месцы пражывання непрацаздольнага грамадзяніна, за якім ажыццяўляецца догляд атрымальнікам паслугі.
Па пытаннях удзелу ў практычных занятках звяртацца ў рабочыя дні з 8 да 17 гадзін па адрасе: г. Валожын, вул. Міру, д. 8 ці па тэлефонах: 68105, 68075, 68113.
Валожынскі тэрытарыяльны цэнтр сацыяльнага абслугоўвання насельніцтва
